Зул. Йисан виридалайни гуьзел вахт. ТIебиат лап лугьуз тежер кьван гуьлуьшан хьанва. Тарар, тамар, чуьллер иллаки гуьлуьшан я. Цавай дурнайрин цIиргъ физва, абуру Кьибледихъ лув гузва. Гьавада миргин гъерер къекъвезва, тIебиатдал ашукь къушари шад маниярни макьамар язава. ТIебиатдин и гуьзел вахтуникай лап яргъалди рахаз жеда.
Ингье и йикъара Кьурагьрин сад лагьай нумрадин юкьван школадин библиотекада йисан и вахтуниз талукь яз “Де сагърай вун, къизилдин зул!” кьил гана, ачух тарс кьиле фена. Ам тешкилайди ва кьиле тухвайди Кьурагьрин сад лагьай нумрадин юкьван школадин лезги чIалан муаллим Гьамият Семедова ва и школадин 5 “а” классдин ученикар я.
Сифте нубатда муаллим Гь.Семедовади зулун гуьзелвиликай, тIебиатда зулуз жезвай дегишвилерикай, зулуз инсанрин зегьметдикай гегьенш суьгьбет авуна. Гуьгъуьнлай 5 “а” классдин аялри, 1 “а” классдин аялриз жаваб яз, зулукай чи шаирри кхьенвай шиирралди тIебиатда зулун шикилар ачухдаказ къалурна. И карда кьве классдизни регьбервал гайи муаллим Рамазанова Рагьимата тарсуниз алава “рангар гана”, са жерге мисалралди тарсунин таъсирлувал артухарна.
Сифтегьан классрин муаллим Раиса Сефералиевади, зулун тIе-биатдиз талукь са шумуд суал гуналди, аялрин фикир зулуз тIебиатда хьанвай дегишвилерал кье-тIендаказ желб авуна.
Гьам чIехи, гьам гъвечIи классрин муаллимрин иштираквал аваз тухвай ачух тарсунин менфятлувал адакай ибарат хьана хьи, сифте нубатда зул — им йисан виридалайни гуьлуьшан вахт я, вучиз лагьайтIа, тIебиатда зулухъ гьам гьайванрин, гьам инсанрин уьмуьрда хейлин дегишвилер кьиле физва.
Тарс гьам аялрин ва гьам муаллимрин иштираквал аваз, итижлудаказ кьиле фена. Са жерге аялри чпихъ артиствилин алакьунар авайдини ачухдаказ къалурна. Абурун жергеда 5 “а” классдин ученикар тир Сайфаева Ашура, Гьасанов Аслан, Эмирбеков Гьажимурад, Къурбанова Саният, Асваров Исмаил, Абдуллаева Сефият авай.
Белки, гележегда и аялри чIехи сегьнейра чпиз лайихлу чкаяр кьада жеди. Чун и кIвалахдихъ лап кIевелай инанмиш я.
Гьажиханова Заминади, Юсупова Маринади, Шабанова Варцалая и тарсунин менфятлувиликай ва кьетIенвиликай гегьеншдаказ лагьана. Школадин психолог Мисриева Эльвиради вичин рахунра аялрин къанажагъдиз абурун дуствилиз ва зегьметда хъсан агалкьунар къазанмишуниз талукь тир са жерге месэлайрикай лагьана.
5 “а” классдин руководитель Назаралиева Заиради гележегда аялрихъ гьам кIелунра, гьам зегьметда еке агалкьунар хьана кIанзавайдакай лагьана. Мярекатдал урус чIалан муаллим Исакьова Эльвиради, библиотекадин заведующий Гьажиева Иринадини иштиракна.
Ихьтин тарсар школада мукьвал-мукьвал тухун абуру чпин мурад тирдакай лагьана.
П.Магьарамова
