Агъа СтIал-Къазмайрал кардик квай “Чубарук” тIвар алай аялрин бахча неинки Сулейман-Стальский районда, гьакIни Кьиблепатан Дагъустанда школадилай виликан чирвилер гузвай образованидин хъсан идарайрикай сад я лагьайтIа, бажагьат зун ягъалмиш жеда.
Аялрин бахча кьве мертебадин гегьенш, гуьрчег акунар алай дараматда ава. ЧIехи ва гегьенш гьаятни хъсандиз дуьзмишнава, гьар жуьредин цуьквери, гьамиша къацуз амукьдай кул-кусри, къайдадик кваз цанвай тарари, аялри чпин вахт менфятлудаказ тухун патал эцигнавай тадаракри, плитаяр туна туькIуьрнавай кIвачин гуьтIуь рекьери ва ана авай михьивили гьар са касдин гуьгьуьлар шадарзава.
“Чубарук” аялрин бахчадиз вичихъ педагогвилин рекьяй кьилин образование авай пешекар, аялрал рикI алай Рена Фахрудиновна Рагьмановади регьбервал гузва.
— За жуван ва бахчада авай аялрин арада са тафаватни твазвач, — рикI алаз тикрарда Р. Рагьмановади. — Гьакьван аялар авай зун бахтлу инсан, дидени я.
“Чубарук” бахчади вичин ракIарар 2015-йисан 1-сентябрдиз ачухна.
Р. Рагьмановади чаз лагьайвал, бахчада 6 группа кардик ква, алай вахтунда 2 йисалай 7 йисал кьван яшда авай 148 аял ава. БицIекрин къуллугъда 16 педагог, жуьреба-жуьре маса хилерай пешекарар акъвазнава.
“Чубарук” бахчадин хъсан крарикай рахадайла, чаз сифте нубатда ина кардик квай бицIекрин хореографиядин дестедикай сад-кьве гаф лугьуз кIанзава. Адаз вичихъ махсус образование авай муаллим-пешекар Индира Магьмудовади регьбервал гузва. Ада бицIекриз кьуьлер ийиз, манияр лугьуз, гъвечIи сегьнейра къугъваз чирзава. И рекьерай бицIекрин дестедихъ алакьунар, агалкьунарни ава. Идан гьакъиндай “гъвечIи артистриз” ганвай 10-далай виниз грамотайри шагьидвал ийизва.
Милли парталар алаз бицIекри районда тухузвай культурадинни шадвилин саки вири мярекатра иштиракзава, устаддаказ жуьреба-жуьре нумраяр къалуруналди, тамашачийрин гуьгьуьлар шадарзава.
БицIекрин хореографиядин десте Вирироссиядин ва республикадин конкурсрин гъалибчини я.
“Чубарукда” аялрин зигьин, кьатIунар артухардай, абуруз сифтегьан чирвилер гудай (гьарфар кхьиз, математикадин гьисабунар ийиз) серенжемар кьиле тухузва.
— Чна бицIекриз дидед чIал чируниз, абур и чIалал ашукьарунизни кьилин фикир гузва, — давамарзава ихтилат Рена Фахрудиновнади. — ИкI, чна аялриз лезги шаиррин манияр, халкьдин мисалар, лезги кьуьлер, адетар чирзава, аялрихъ галаз вири мярекатар лезги чIалалди тухузва.
Чун шагьид хьайивал, аялрин бахчада кIвалах виликамаз туькIуьрнавай план-графикдин бинедаллаз тухузва.
Гьа са вахтунда, ина коронавирусдихъ галаз алакъалу яз санитариядин истемишунрал амал ийизва, герек вири шейэрни чкадал ала. Идан нетижа яз тIугъвалдин вахтунда бахчада бицIекрал ифинар акьалтай, маса начагъ дуьшуьшар хьанач. Медсестради бицIекрин сагъламвал гьар юкъуз ахтармишзава.
Хазран Кьасумов
