Алай йисан 5-июндиз жавабдар къуллугъчи, гьуьр­метлу яр-дуст ва играми буба  Жабраилов  Жабраил  Агьмед­агъаевича  вичин хайи югъ шад гьалара къейдда.

Ж.Жабраилов 1955-йисуз Рутул райондин Играхрин хуьре дидедиз хьана. Буба Агьмедагъа — Ватандин ЧIехи дяведин иштиракчи, II группа­дин инвалид, диде Бажикъиз далу патан фронт­дин зегьметкеш тир. Ви­чин сагъламви­ле набутвал авай­тIани, рикIе къастар авай ам секин акъвазнач. 1975-йисуз  Хъуьлуьдрин юкьван школа, Дербентда  кьве йисан бухгалтервилин курсар, гуьгъуьнлайни Буйнакскда хуьруьн майишатдин техникум акьалтIар­на. Зегьметдин рехъ Ж.Жабраилова Ме­гьарамдхуьруьн райондин ЦIе­легуьн­рин хуьруьн (хизан иниз куьч хьанай) “Серго” тIвар алай совхозда бухгалтер-учетчиквилелай башламишна. Совхозда кIвалахай йисара ада гьар жуьре къуллугъар авуна. Чирвилерихъ ялзавай ам се­кин яз акъвазнач — 1984-йисуз Казандин финансринни кредитдин рекьяй институтдиз гьахьна, финансис­т­вилин пешекарвални къачуна.

1992-йисан мартдилай Мегьарамдхуьруьн райондин общественный бинедаллаз арадал атанвай Вирироссиядин инвалидрин обществодин (ВОИ) отделенидин председателвиле тайинарна. Сифте йикъалай башламишна, райондин инвалидрин итижар, ихтиярар хуьзвай Жабраил Агьмедагъаевича,  вич инсанрихъ галаз рахадай тегьер­ чидай, масадан дердиникай хабар кьадай инсан яз къалурна. Ада регьбервал гузвай ВОИ-дин отделение (алай вахтунда аник 4 район акатзава: Мегьа­рамдхуьруьн, До­­къузпара, Ахцегь ва Ру­тул) республикада кIвенкIве­чи жергейра ава. Чи ватандашдин жавабдар зегьмет республикадин отделенидин, Вирироссиядин инвалидрин отделенийрин правленидин гьуьрметдин грамотайралди лишанлу авунва. Райондин кьи­ле авайбуруни Жабраил Агьмедагъаевичан зегьметдиз, алахъунризни алакьунриз лайихлу къимет ганва­.

Вичин зегьметдин рехъ хьиз, Жабраил Жабраилова уьмуьрдин рехъни намуслудаказ кьиле тухвана. Диде-бубади тербиялу кьве велед шегь­ре рекьел акъуднава. Руминади ДГУ-дин химиядинни биологиядин факультет агалкьунралди акьал­тIар­на. Алай вахтунда Каспийск шегьердин аялрин бахчадин заведующий яз зегьмет чIугвазва. ЧIехи бубадин тIвар хганвай хва Агь­мед­­агъа­ди Махачкъалада политехнический техникум акьалтIарна. Алай вахтунда ам Москвада яшамиш жезва. Росгвардияда зегьмет чIуг­вазва.

Гьуьрметлу Жабраил Агьмедагъаевич, чна квез хайи югъ рикIин сидкьидай мубаракзава. Чи мурад Квехъ яргъал йисарин хушбахт уьмуьр ва ба­лайр­икай рикI динж хьун я.

Афисат  Айдемирова