Дагъустандиз атанвай Виридуьньядин къадим шегьерринни къелейрин ассоциациядин Италиядай тир делегация и йикъара Дербент шегьердиз мугьман хьана — хабар гана Дербент шегьердин администрациядин пресс-къуллугъди.

Абур мугьманвилиз атун Москвада кьиле физвай Виридуьньядин къадим шегьерринни къелейрин “Интурмаркет -2017” международный туризмдин выставкадин ва РД-дин туризмдинни халкьдин художественный сеняткарвилерин министерстводин — “Дербент — 2000” туризмдин центрадин ведомствойрик акатзавай идарайри кутlуннавай икьрардин сергьятра аваз кьиле фена.
Делегациядик квай Ассоциациядин Президент Фабио Пигнателли, архитектор Андреа Грилетто, инженер Чезаре Скотони, архитектор Джорджиа Джентилини ва Дагъустандин Минтуризмдин векилар Дербент шегьердин кьил Малик Баглиева, шегьердин депутатрин собранидин председатель Мавсум Рагьимова, шегьердин администрациядин кьилин заместитель Мегьти Алиева ва масабуру шад гьалара къаршиламишна ва итальянвийрин фикирдиз алай вахтунда кьилиз акъудзавай шегьердин проектар гъана.
Мугьманри чеб эхиримжи сеферда Дербентдиз атайдалай инихъ шегьерда кьиле фенвай дегишвилер къейдна.
Фабио Пигнателлиди чеб хушдиз кьабулунай М. Баглиеваз сагърай лагьана ва давамарна: “Россиядин тарих Кавказдилай башламиш жезва, чна Дербент СКФО-дин виридалайни гуьрчег шегьеррикай сад яз гьисабзава. Италиядин гьукуматди авай гьал чирунин, культурадин ирсинин объектар туькlуьр хъувунин (реставрация) карда куьмек гунин рабочий дестеяр тешкилунин тапшуругъ ганвай. Виридалайни четин кlвалах, чи фикирдалди, шегьерэгьлийрив чеб гьихьтин девлетлу культурадин ирссагьибар ятlа гьиссиз тун я”.
Рахай муькуь мугьманрини чеб жуванбур хьиз кьабулунай вири дербентвийриз сагърай лагьана ва абурун рикlин ачухвал, мугьман кlанивал къейдна.
Дербентда хьайи йикъара мугьманар культурадин ирсинин объектар тир Нарын-къеледиз, шегьердин тарихдин магьалриз, Эрменийрин килисадиз ва муькуь музейрин комплексриз килигна.

Къагьриман Ибрагьимов