Чи ватанэгьлияр — гьар сана
Майкопда авай чи ватанэгьли Икрам Игитович Велиевакай, ада дагъустанвийрихъ галаз санал Адыгеяда авай чи республикадин векилханада (гаф кватай чкадал къейд ийин, Адыгеядин меркезда РД-дин векилханади кIвалахиз 20 йисалай виниз я) тухузвай кIвалахрикай заз фадлай хабар авай.
Халкьарин, миллетрин, динрин арада меслятвал, ислягьвал хуьнин рекьяй жемиятдин крара агалкьунралди иштиракзавайвиляй адав цIи Дагъустандай чIехи шабагь агакьна: 25-июлдиз РД-дин милли сиясатдин ва динрин крарин рекьяй министр Энрик Муслимова Икрам Велиеван зегьмет миллетрин арада ислягьвални садвал мягькемарунай сейливилин лишандалди къейдна. Шабагь «Лезги газетдин» редакциядин коллективдин патай мубарак авуналди, ихьтин лайихлу ватанэгьлидихъ галаз газет кIелзавайбурни танишарун хъсан яз акуна заз.
Ери-бине Кьурагь райондин Куквазрин хуьряй тир Велиев Икрам 1981-йисан 18-сентябрдиз Къазахстандин Никольск шегьерда дидедиз хьана. Вири аялри хьиз, Икрамани мектебда чирвилер къачуна. 1998-2003-йисара О.А. Байконурован тIварцIихъ галай Жезказгандин университетдин инженерно-механический факультетда кIелна. Кьилин образование къачур ва кIвалахдай еке ашкъи авай жегьил Къазахстандин Карагандадин областда авай ЗГШО-диз (завод горно-шахтного оборудования) рекье туна. Ина зегьметдин рехъ слесарвилелай башламишна, гуьгъуьнлай адакай инженер-технолог, инженер-конструктор хьана. Гьа са вахтунда кьилин кьвед лагьай образование къачун патал Карагандадин Казпотребсоюздин университетдик («государственное и местное управление» хиляй) экечIна.
Ахлакь, низам хъсандиз чидай, хкянавай пешейрин рекьяй агалкьунралди кIвалахдай мумкинвилер авай жегьил пешекар къуллугъдин рекьяйни хкаж хьун тIебии кар я: ам жегьилрин союздин кьиле акъвазна, профсоюздин чкадин тешкилатдин патай кьве сеферда депутатвиле хкяна.
Гуьгъуьнлай адаз Россиядиз куьч хъжез кIан хьана. Ватанди вичихъ ялзавай. ИкI, 2012-йисалай ам Россияда, 2015-йисалай Адыгеядин меркезда яшамиш жезва. Алай вахтунда ада Майкопда стоматологиядин клиникадин директордин заместитель яз кIвалахзава. Жемиятдин крара иштиракдай ашкъи авай Икрам Игитович Адыгеяда авай Дагъустандин векилдин куьмекчини я.
Шабагьдикай ихтилат кватайла, Икрам Велиева лагьана: «Майкопдиз са шумуд сеферда Дагъустандин музыкантрин союздин председатель, актер, РФ-дин искусствойрин деятель Хан Баширов журналист, политологиядин илимрин кандидат Эдуард Эмировахъ галаз атана. Нубатдин сеферда абур иниз Х. Баширован юбилейдиз талукь тир яратмишунрин межлисрихъ галаз алакъалу яз илифнавай. Чна, дагъустанвийри, абур хушвилелди кьабулна, алакьдай куьмекар гана. Хан Мирзехановичахъ галаз зун 2017-йисалай таниш я. Чна алакъалувилелди кIвалахзава, камаллу, менфятлу меслятар гузва чаз агъсакъалди. Заз хурал алкIурдай сейливилин лишан гун патал РД-дин милли сиясатдин ва динрин крарин рекьяй министр Энрик Муслимован тIварцIел тавакъу ракъурайбур Хан Башировни Эдуард Эмиров я. Идалай вилик заз винидихъ тIвар кьунвай министерстводи Гьуьрметдин грамота ганай».
И. Велиеван хизанда кьве веледдиз тербия гузва. Диде-буба Дагъустанда яшамиш жезва. Уьмуьрдин юлдашди Майкопда пешекарвилин дережа хкаждай республикадин институтдин директордин заместителвиле кIвалхзава.
Къазахстандай чи уьлкведиз куьч хъхьунин себебдикай хабар кьурла, Икрама ихтилат давамар хъувуна: «Ватандивай яргъа яшамиш хьуни мукьва-кьилийрин арада авай алакъаяр атIузва, жуьреба-жуьре мярекатра иштиракун патал гьамиша хкведай мумкинвилерни жезвач. Къазахстандай иниз зун жуван ватандиз мукьва хьун патал куьч хьана. Амма зи аялвилин, жегьилвилин вахтар гьана акъатна. Уьмуьрдин рехъ гьана башламиш хьана, зи дустар, санал кIвалахай юлдашар, муаллимар (гзафбурухъ галаз за исятдани алакъаяр хуьзма) гьана ава. Яшайиш кьиле тухун патал Къазахстанни пис чка туш, амма ватан вирибуруз ширин жеда. Бубайрин ватан тир Куквазрин хуьруьзни зун мукьвал-мукьвал хъфизва. Гзаф авачтIани, Майкопда лезгияр мад авачиз туш. Чна, гьам лезгийри, гьам вири дагъустанвийри, мярекатра санал иштиракзава. Чи меденият, адетар, ацукьун-къарагъун, тарих акьалтзавай несилдиз чир хьун важиблу кар яз гьисабзава. Халкьдин мисалда лагьанвайвал, дувулар галачир тар, тарих авачир халкь жедач. Чи халкьдихъ дамахдай крар, гьунарлу векилар гзаф хьана, ава ва хъжеда. Гьахьтин рухваяр чешне хьана кIанда жегьилриз».
Агалкьунар хьурай гьар сана авай лезгийрихъ!
Куругъли Ферзалиев
