Москвада октябрдин са шумуд юкъуз пауэрлифтингдай (WRPF версиядай) дуьньядин чемпионат кьиле фена. Кьурагь райондин администрациядин пресс-къуллугъди хабар гузвайвал, 31 уьлкведай 1752 спортсменди чпин алакьунар къалурай акъажунра Дагъустандин патай Ислам Рамазанова иштиракна. Исламан ери-бине Кьурагь райондин Усугърин хуьряй я, амма вич Дербент шегьердин агьали я. дуьньядин чемпионатда ада 82,5 кг заланвал авайбурун арада сад лагьай чка кьуна.
Залан атлетикадай зурба алакьунар авай кьурагьви дуьньядин виридалайни къуватлу пуд пагьливандин жергеда гьатна.
Къейд ийин, и мукьвара медениятдин управленидин начальник А.Арухова, спортдин отделдин начальник Наваи Рзаева гъалибчи тебрикна ва ам медалралди къейдна.
Къуватлу ватанэгьлидихъ мадни зурба къуват хьурай!
«Лезги газет»
