10-августдиз Дербент шегьерда Украинада кьиле физвай махсус серенжемдин Ахцегь райондай тир иштиракчийрин аялриз сиягьат тешкилнавай. Мергьяматлувилин мярекат жемиятдин деятель, машгьур меценат Нариман Гъазалиевич Гъазалиеван куьмекдалди кьиле тухвана.
Сиягьатдин сергьятра аваз, мектебда кIелзавай яшара авай 30-далай виниз аялар къадим шегьердин къеледихъ, тарихдин маса имаратрихъ ва Дербент райондин Арабляр хуьруьз мукьва мулкара Каспий гьуьлуьн къерехда авай «Лунь» экранопландихъ галаз таниш хьана.
Аялри чIехи гьевесдивди Дербентдин сур куьчейра, къеледа сиягьат авуна. Виридалайни пара абуруз «Лунь» экраноплан итижлу хьана. Аялрин гафаралди, и сиягьат абурун рикIел геждалди аламукьда. Мярекатдин эхирдай сиягьатдин иштиракчийриз тIямлу хуьрекар алай суфрани ахъайнавай.
«Украинада кьиле физвай махсус серенжемдин иштиракчийриз ва абурун хизанриз куьмекар гун чи умуми буржи я. Къенин сиягьатдин иштиракчийрин арада, гьайиф хьи, чпин бубаяр СВО-да телеф хьанвайбурни авай. Чна абур фикир тагана туна кIандач, мумкинвилериз килигна, алакьдай куьмекар гун хъсан я. Чи пакадин югъ тир аялрин патахъай къайгъу чIугун, абуруз шад легьзеяр багъишун сувабдин кар я», — лагьана Нариман Гъазалиева.
Нариман Гъазалиевича тешкилнавай мергьяматлувилин им сад лагьай мярекат туш. Мисал яз, алай йисуз ада вичин такьатрихъ СВО-дин иштиракчийрин 7 хизандай аялар Кьурагь райондин КIирийрин хуьре авай «Лекьрен муг» этнолагердиз рекье туна. Абурун арада Ахцегь, Докъузпара, Мегьарамдхуьруьн, СтIал Сулейманан, Кьурагь, Хив ва Дербент районрай тир аялар авай.
Къуй чи жумарт ватанэгьлийрилай Аллагь рази хьурай!
Чи мухбир
