2024-йисуз Дагъустанда XX асирдин Гомер СтIал Сулейманан 155 йис тамам хьунин юбилей республикадин дережада аваз къейдда. РД-дин Гьукуматдин Председатель Абдулмуслим Абдулмуслимова Дагъустандин халкьдин шаирдин 155 йисан юбилей къейд авуниз гьазурвилер акунин ва мярекатар кьиле тухунин жигьетдай кIвалахдайбурун махсус десте арадал гъуниз талукь тапшуругъдал къул чIугунва.
Къейд ийин хьи, дестедик республикадин вице-премьерар, гьукумдин жуьреба-жуьре органрин регьберар, медениятдин деятелар ва СМИ-рин векилар кутунва. Абур шаирдин юбилейдиз талукь план гьазурунал ва мярекатар тешкилунал машгъул жеда. КIвалахдайбурун дестедик кутунвайбурун арада «Лезги газетдин» кьилин редактор, Урусатдин журналистрин Союздин Дагъустанда авай отделенидин председатель Мегьамед Ибрагьимовни ава.
«СтIал Сулейман неинки чIехи шаир, гьакIни государстводин машгьур деятель тир. Ада Советрин девирдилай виликан Дагъустандин шииратдин бине кутуна. Гьикьван кьакьан дережайриз хкаж хьанатIани, ам рикIин къеняй адетдин зегьметкеш яз амукьна. Шаирдихъ уьмуьрда хьайи агалкьунарни адан хсуси ва гьалаллу зегьметдин нетижа я. Алай йисуз чна адан экуь къамат, ирс хуьнин мураддалди шадвилин мярекатар тешкилда. Республикадин машгьур векилрин къамат эбеди авун, акьалтзавай несилрал абурукай жезмай кьван пара малуматар агакьарун чи умуми везифа я», — лагьана А.Абдулмуслимова.
РикIел хкин, СтIал Сулейман 1869-йисан 18-майдиз Агъа СтIалдал лежбердин хизанда дидедиз хьана. Адан сад лагьай шиир «Билбил» эсер яз гьисабзава (1900-йис). 1934-йисуз Дагъустандин государстводин чапханада хайи чIалал шаирдин сад лагьай ктаб чапдай акъатна. 1936-йисан сентябрдин вацра СтIал Сулейман Дагъустандин писателрин Союздин Правленидин регьбервиле хкяна, 1937-йисан октябрдин вацра ам СССР-дин Верховный Советдин депутатвиле кандидат яз къалурнай.
Агьмед Магьмудов
