Туьркиядай атанвай мугьманри чеб къведай йисуз Бурса шегьерда 10 йикъан муддатдалди тербиячини галаз 12 йисалай 16 йисал къведалди яшар хьанвай
10 школьник кьабулиз гьазур тирдакай лагьана
Сулейман-Стальский райондин кьил Нариман Абдулмуталибов гьа и ерийрай акъатай ксарин Туьркиядин Бурса шегьерда яшамиш жезвай невейрихъ, гьакIни Къазахстан Республикадин Актау шегьерда авай лезгийрин этнокультурный “Самур” тешкилатдин председатель Гьажимегьамед Cелимовахъ галаз гуьруьшмиш хьана.
Туьркиядай тир делегациядик лезгийрин машгьур алим ва шаир Рухун Алидин невеяр тир Рамазан Кор, Мугьамед Ашир ва Умар Акбаш квай. Эхиримжи 25 йисуз абуру Дагъустанда авай чпин мукьва-кьилийрал са шумудра кьил чIугуна.
Рамазан Кор, Мугьамед Ашир ва Умар Акбаш Бурса шегьерда авай медениятдин “Дернек” центрадин членар я. И мескен лезгийрин милли адетар чирунал, хуьнал ва гегьеншдаказ раиж авунал машгъул жезва. Рамазан Кор музыкадин алатар (кларнет) гьазурдай устIар, Мугьамед Ашир вичин бизнесни авай дерзичи устIар, Умар Акбаш автомобилрин чархар гуьнгуьна хутадай устIар я. Мугьманар улу-бубайрин ватандиз мукьва-кьилийрал кьил чIугун, райондин агьалийрин уьмуьрдихъ ва килигуниз лайихлу чкайрихъ галаз таниш хьун патал атанвайди я. Кьилди къачуртIа, абур Алкьвадар Гьасан-эфендидин ва СтIал Сулейманан музейра хьана.
Алкьвадар Гьасан-эфендидин музейда анин регьбер Гьуьсейн Гьуьсейнова мугьманар Дагъустандин машгьур алимдин, философдин, шаирдин уьмуьрдихъ ва яратмишунрихъ галаз танишарна. Мугьманриз чпин улу-буба Рухун Алидин уьмуьрдиз ва яратмишунриз талукьарнавай стендни къалурна. СтIал Сулейманан музейдин руководитель Лидия Стальскаяди мугьманриз шаирдин гуьнгуьна хтунвай КIвалин-музейдин вири экспонатар къалурна.
Мугьманри музейриз къвезвайбурун ктабра чпин фикирар раижзавай кхьинар авуна. Абуру Нариман Абдулмуталибоваз Туьркиядиз чпин патав атун теклифна. Рамазан Кора къведай йисан гатуз Бурса шегьерда вич 10 йикъан муддатдалди тербиячини галаз 12 йисалай 16 йисал къведалди яшар хьанвай 10 школьник кьабулиз гьазур тирди къалурна. Гьа са вахтунда абуруз ингилис ва лезги чIалар чир хьунин шартIни эцигна. Аялар Туьркияда яшамиш жезвай лезгийрин адетрихъ ва уьмуьрдин шартIарихъ галаз таниш жеда. Государстводин гьисабдай аялар патал гьуьлуьн къерехда ял ягъун тешкилда. Рекьин харжияр райондин администрацияди вичин хивез къачузва. Райондин кьил Нариман Абдулмуталибова мугьманриз савкьат яз лезгийрин куьгьне девиррин нехишар алай, гъилел хранвай тапрак багъишна, гьакIни дидед чIал ва хайи халкьдин адетар хуьнай абуруз сагърай лагьана.
Къазахстан Республикадин Актау шегьерда авай лезгийрин этнокультурный “Самур” тешкилатдин председатель Гьажимегьамед Селимова милли диаспорайрин гьар йикъан уьмуьрдикай гегьеншдаказ суьгьбетна, абуру чпин ери-бине Дагъустандай тир ксарихъ галаз хъсан къуншивилин алакъаяр хуьнин ва мягькемарунин рекьяй, суварин мярекатар тешкилунин, аялриз дидед чIал, милли адетар чирунин, лезгийрин медениятдин ивирар раиж авунин рекьяй еке кIвалах тухузвайди къейдна.
Гуьруьш кьиле фидай чIавуз Гьажимегьамед Селимова райондин кьил Нариман Абдулмуталибоваз “Астана” ва “Мангышлакдин область” тIварар ганвай кьве ктаб багъишна. И ктабра Къазахстанда авай лезгийрин диаспорадин ва лезгийрин этнокультурный “Самур” тешкилатдин уьмуьрдиз ва кIвалахдиз талукь делилри еке чка кьазва.
Гьажимегьамед Селимова Нариман Абдулмуталибоваз Актау шегьерда алай йисан октябрдиз лезгийрин этнокультурный “Самур” тешкилатди кьиле тухудай суварин серенжемра иштирак авун теклифнава. Кьилди къачуртIа, Къазахстандин меркез Астана шегьердин 20 йисаз, Мангышлакдин областдин 55 йисаз, шаир Сажидин Саидгьасанован 85 йисаз, лезгийрин шаир, писатель, драматург, публицист, композитор Седакъет Керимовадин 65 йисаз талукьарнавай серенжемарни кьиле тухуда.
Вичин нубатдай яз райондин кьили мугьманриз багъри ерийрал кьил чIугунай сагърай лагьана, алакъаяр мадни мягькем хьунихъ умудлувал къалурна, гьакIни Гьажимегьамед Селимоваз лезги устIарри гьазурнавай савкьатар гана.
«Лезги газет»
