Куь ихтиярар
Инвалид аялар авай диде-бубайриз алава пособиярни, кьезилвилерни, зегьметдин заминвилерни талукь я. РД-дин МФЦ-дин кьилин идаради раижнавайвал, инвалид аялар авай хизанривай агъадихъ галай кьезилвилерикайни пособийрикай менфят къачуз жеда:
— диде-бубадикай садавай (ва я къаюмвалзавайдавай) вацран къене ял ядай 4 югъ алава яз къачуз жеда, и йикъарин гьакъини гуда;
— диде-бубадикай садавай (ва я къаюмвалзавайдавай) вичиз къулай тир гьар гьи вахтунда хьайитIани гьакъи гузвай отпускдиз экъечIиз жеда;
— кхьена къалурнавай разивилин чар галачиз инвалид галай диде-бубаяр йифен вахтунда, ял ядай ва суварин юкъуз кIвалахал желбдай ва командировкайриз ракъурдай ихтияр авач.
КIвалахал акъвазунин программа. Инвалид аялар галай диде-бубайривай жегьилриз талукь махсус программадай кIвалахал акъвазиз жеда. Кьилин шартI яшар 30 йисалай артух тахьун я.
Аялрин пособияр. Аялрин пособияр тайинардайла, инвалид аялрихъ гелкъвезвай диде-бубайривай алава кьезилвилер (льгота) къачуз жеда.
ЖКУ-дай гузвай харжийрин эвез вахчун. Инвалид аялар авай хизанривай яшамиш жезвай кIвалин коммунальный къуллугърай, капитальный ремонтдай гузвай гьакъидин 50 % элкъвена вахчуз жеда. И кьезилвилерикай менфят къачун патал агьалийривай яшайишдин рекьяй хуьнин идарадиз ва я МФЦ-диз арза вугуз жеда.
Диде-бубадиз вахтунилай вилик страховой пенсия. Муьжуьд йисал кьван яшара авай инвалид аялдиз тербия гузвай диде-бубадикай садаз вахтунилай вилик страховой пенсия къачудай ихтияр ава. Бубадиз — 55 йис хьайила ва 20 йисалай тIимил тушиз страховой стаж авайла. Дидедиз — 50 йис тамам хьайила ва 15 йисалай тIимил тушиз страховой стаж авайла.
Паспорт къачуникайни дегишаруникай
Малум тирвал, 14, 20 ва я 45 йисан яшара авай ватандашриз паспорт къачун, дегишарун талукь я. 14 йисан яшдив агакьнавайбуруз паспорт къачун патал герек жеда: диде-бубадин паспортар; хайивилин шагьадатнама (ламинировать тавунвайди); 3,5х4,5 кьадардин шикил, 300 манат госпошлина гун.
20 ва 45 йис хьайила, паспорт дегишарун патал герек жеда: куьгьне паспорт; 300 манат госпошлина гун, 3,5х4,5 кьадардин 3 шикил; эвленмиш хьунин гьакъиндай шагьадатнама (аваз хьайитIа).
Паспорт къачунин, дегишарунин арза, хайи йикъан пакадин йикъалай башламишна, 90 йикъан къене гуз жеда. Паспорт дегишарунин муддат 5 югъ я.
«Лезги газет»
