31-январдиз Сулейман-Стальский райондин ДаркIуш-Къазмайрин хуьруьн мектебда РФ-дин — лайихлу, Дагъустандин халкьдин артист Абдулкъадир Сайдумован 90 йисан юбилейдиз талукь шадвилин мярекат кьиле фена.
А.Сайдумов вичин вахтунда инсанриз датIана хъвер багъишай артист, къемеда-писатель, сегьнедин зурба устад, кьетIен бажарагъдин сагьиб тир. Пуд сятда кьиле фейи мярекатдал и кар мад сеферда тестикь хьана.
Мярекатда Сулейман-Стальский райондин кьил Нариман Абдулмуталибова, “Лезги газетдин” векилар тир Мердали Жалилова, Нариман Ибрагьимова, и цIарарин авторди, СтIал Сулейманан тIварунихъ галай Лезгийрин гьукуматдин муздрамтеатрдин дестеди, яратмишзавай хейлин векилри, юбилейдин сагьибдин яратмишунрал рикI алайбуру, танишри, багърийри, гьакI хуьруьнвийрини иштиракна.
Мектебдин директор Севзихан Севзиханова вирибур тебрикуналди мярекат ачухна, Абдулакъадир Сайдумован уьмуьрдин рекьикай куьрелди ихтилатна. Артистдин биографиядин делилар мектебдин лезги чIалан муаллимдини раижна. А. Сайдумов са жерге шабагьрин, лайихлу тIварарин сагьиб я. Халкьдин рикI алай артист 2002-йисуз рагьметдиз фена.
Н.Абдулмуталибова мярекатдиз хъсан къимет гана.
— Ихьтин мярекатри чи арада авай гьуьрмет артухарзава. Чна къе чи машгьур инсан — Абдулкъадир Сайдумов — рикIел хкизва. Халкьдиз намуслувилелди къуллугъ авур, Аллагьдин патай пай гайи бажарагълу артистди вичин тIвар чи пак ктабра тунва… Адан яратмишунрал кьару инсанар амай кьван артистдин тIварцIи чи халкьдиз куьмекда. Абдулкъадир Сайдумован алакьунар гьукуматдини къейднава, адан тIварцIихъ янавай куьчеяр ава, мярекатар тешкилзава. Ихьтин серенжемриз администрацияди идалай кьулухъни фикир гуда. Чна адан къамат гьамиша рикIера хуьда, — лагьана райондин регьберди.
Н.Абдулмуталибова Махачкъаладай, Дербентдай, къунши районрай атай А.Сайдумован яратмишунрин терефдарризни чухсагъул лагьана. Рахунрилай кьулухъ ада мектебдиз хъенчIин квар ва А.Сайдумован «Хиялрин хтар» ктабар пишкешна.
А. Сайдумовакай лезги театрдин директор Динара Эминовади, РД-дин халкьдин артист Мирзебег Мирзебегова, шаирар ва журналистар тир Мердали Жалилова, Нариман Ибрагьимова, Шагьабудин Шабатова, ДаркIуш-Къазмайрин мектебдин муаллим Маният Мегьамедовади ва масабуру ихтилатна. Абуру чпин яр-дуст, вафалу инсан, къемеда-артист, къемеда-шаир хьайи Абдулкъадир Сайдумован уьмуьрдихъ галаз алакъалу итижлу рикIел хкунар, агьвалатар ахъайна. «Лезги газетдин» литературадин отделдин редактор Мердали Жалилова мярекатдин иштиракчияр редакциядин коллективдин патай тебрикна. Ада, А.Сайдумован бажарагъдиз еке къимет гунихъ галаз сад хьиз, ам марифатлу, къанажагълу инсан хьайиди къейдна. Шаирди мярекатдин иштиракчийрин рикIел маса шаирри, писателри артистдиз бахшнавай шиирарни, адакай лагьанвай келимаярни рикIел хкана.
Театрдин артистри А. Сайдумов къугъвай тамашайрин чIукар къалурна, манияр тамамарна. Чкадин мектебдин аялри, муаллимри артистди вичи кхьей ва адаз маса шаирри бахшнавай шиирар кIелна, манияр тамамарна. Мярекат музыкадин рекьяй «ДаркIуш» ансамблди гурлу авуна.
Эхирдай рагьметлу артистдин уьмуьрдин юлдаш Якъут Сайдумовади мярекат тешкилайбуруз, иштиракай мугьманриз сагърай лагьана.
Куругъли Ферзалиев
