Майдин суваррин вилик чаз хабар хьайивал, чи бажарагълу хва, медицинадин къуллугъдин полковник, хъсан тешкилатчи Езибег Гьайбатович Агьмадов цIийиз ахъайнавай “Целитель” тIвар алай поликлиникадин кьилин духтурвиле хкянава.
Алай аямда хейлин идарайрин руководителар конкурсдин бинедаллаз хкягъун адетдиз элкъвенва, яни лайихлубурукай лап лайихлуди кьилиз акъудзава.
Езибег Гьайбатовичахъ галаз, чаз малум хьайивал, кьилин духтурдин къуллугъдал акъвазиз кIанз, конкурсда мад ругуд касди иштиракна. Комиссияди артуханвал лезги хцин тежрибадиз, алакьунриз, инсанвилин ерийризни гайидал шак алач.
Гьакъикъатдани, Езибег Гьайбатович инсанрин сагъламвал хуьдай, мягькемардай къуллугъдин яргъал йисарин рехъ фенва. Вични — кьетIен шартIара, Советрин Армиядин къурулушра къуллугъна, а рекьера ам полковникдин дережадиз кьван хкаж хьана. “Перестройка” лугьудайда ва гуьгъуьнлай СССР хьтин государствони чукIуруни гзаф ксар чеб яшамиш жезвай чкайривай ва къуллугъривайни къакъудна. Езибегни Туркменистандин Мары шегьердай Дагъустандиз, багъри накьварал хтуниз мажбурна.
Ина адан бажарагъ, карчивал такуна амукьнач. Адакай Махачкъала шегьердин мэрияда администрациядин кьил хьана. Чунни адахъ галаз сифте яз гьа чIавуз таниш хьана, шегьердин администрацияда шумуд лезги аватIа, гьакьванбуруз чи газет кхьин тешкилнай. Чна а касдин дилаварвал, гафунинни кардин садвал, михьивал гьисснай…
Инай Езибег Гьайбатович чи шегьерда акьалтIай чкIай гьалда авай, амма лап еке райондиз къуллугъзавай 9-нумрадин поликлиника идара ийиз, дуьз лагьайтIа, ам арадал хкиз рекье туна. Са куьруь вахтунда медицинадин а идара шегьердин лап хъсанбурукай садаз элкъвена, чна анин кIвалахдикай чIехи очеркни кхьенай.
Са вахтундилай шегьердин а чIаван чIехи сагьибриз Езибеган авторитет хкаж хьун са артух хуш хьанач, гьар жуьре багьнайралди ам къуллугъдивай къакъудна.
Рипинал гъуд гьалч жедач лугьуда. Медицинадин къуллугъдин полковникдини вичин сабурни хвена, абурни. Ам кIвалахдивай къекъечIна, вичин кIвалин-къан къайгъуйрик эхкечIна. Амма къизил алай чка яргъайни аквада лугьуда. Езибегазни цIийи къуллугъдал атун патал теклифдай ксар, адан пешекарвилинни тешкилдай кIвалахдин къадир авайбур секин хьанвачир. Ингье гила кас мад вичиз хас чкадал ала!
Чун адаз цIийи къуллугъ мубаракиз фена ва и клиникадин гьакъиндайни са шумуд гаф лугьун тIалабна.
— Медицинадин цIийи центр — “Целитель” алай аямдин вири истемишунриз жаваб гузвай, вини дережадин пешекарралди ва тадаракралди, техникадалди ва технологийралди таъминарнавай идара я, — суьгьбетзава кьилин духтурди. — Девир дегиш хьанва, азарарни гьакьван жуьреба-жуьребур, бязи вахтара ерли чпяй кьил акъудиз тежедай хьтинбур ацалтзава. Бязи вахтара ина, чи меркезда, герек тир куьмекар жагъин тийиз, начагъбур яргъал шегьерриз, яни цIийи шартIар авай центрайриз финиз мажбур жезвай. Им лагьайтIа, чIехи харжийрихъ галазни алакъалу кар я.
Чи поликлиникадихъ гьа и чкадал, дуьз диагноз эцигна, инсанриз чпин уьзуьрар алудиз, сагъламвал хуьз ва мягькемариз куьмек гудай мумкинвал ава. Иллаки рикIинни дамаррин, нервийрин, мефтIедин, япаринни нерин, туьтуьнин, къенепатан органрин, ивидихъ ва цварадихъ галаз алакъалу, ракдин ва мад маса азарар гзаф хьанва. Чебни вири, асул гьисабдай, чи аямдин къайдадикай хкатнавай экологиядин, чна незвай суьрсетрин, хъвазвай цин, яшайишдин шартIарин кьетIенвилерихъ галаз алакъалубур я.
Чи клиника чпихъ 20-30 йисан тежриба авай лап хъсан пешекарралди таъмин я. Гьар са пешекар ина конкурсдин нетижада хкязавайди я. И карди усалбурузни гьиллебазриз рехъ ачухзавач. Идан-адан зенгералдини пуларалди иниз пешекарар кьабулзавач. Гьавиляй парабуру чпин сагъламвал ахтармишунин ва куьмек къачунин крар чи пешекаррал ихтибарзава.
Дугъри я, поликлиникадин къуллугъар пулдихъ ийизва. Амма ина авур харжияр бада физвач. Герек тушир рекьера-хуьлерани куьмек герек ксар къекъвезвач…
Республикадин диагностикадин центрадин патав гвай и идарадин вири вад мертебадани чун махарин уьлкведа хьиз къекъвена. Гьар сана чал чпиз авур ва ийизвай къуллугърилай рази тир ксар гьалтна.
Чи газетдин амадагдихъ — цIийи поликлиникадин кьиле авай полковникдихъ чаз мадни агалкьунар хьун кIанзава. Къуй азарар тIимил, инсанрин сагъламвал мягькем хьурай.
Мерд Али Жалилов
