Уьлкведа 29-июндилай 20-июлдалди давам хьайи 2020-йисан ЕГЭ-яр вахкудай асул вахт кьилиз акъатнава. Мегьарамдхуьруьн районда государстводин сад тир имтигьан вахкунин гьерекатра райондин школаяр акьалтIарнавай 150 выпускникди иштиракна.
Ина имтигьанар вахкунин кIвалах алай йисуз гегьенш майданра чкIанвай тIугъвалдикай аялар хуьн патал Роспотребнадзордин истемишунрал амал авуна тешкилнавай, хабар гузва райондин информациядин агентстводи. Малум хьайивал, аялрин хатасузвал таъминарун патал теклифнавай вири серенжемар ина тамамдаказ кьилиз акъуднава.
Къейд ийин, имтигьанрин вахт башламишдалди вилик абур тухун патал чара авунвай чка авай гьал райондин кьил Фарид Агьмедова ва адан сад лагьай заместителди, райондин образованидин управленидин начальникди, муаллимрин профсоюздин тешкилатдин председателди ва школадин директорди дикъетдивди ахтармишнавай. РикIел хкин, Мегьарамдхуьруьн районда государстводин сад тир имтигьанар Бут-Къазмайрин юкьван мектебда тухузва.
Гьахълу себебар аваз, июлдин вацра ЕГЭ вахкуз тахьай аялар патал имтигьанар вахкудай алава вахт августдиз тайинарнава. Абурун нетижаяр аялривай чеб авай чкайрай чириз жеда: чпин мектебрай, образованидин управленидай, гьакIни ЕГЭ-дин делилрин интернетда авай порталдай.
КьетIендаказ къейд ийин, Мегьарамдхуьруьн райондин мектебар акьалтIарай 41 касди алай 2020-йисуз къизилдин медалар къачунва. Лап хъсандиз кIелуналди тафаватлу хьайи аялрив къизилдин медалар райондин руководстводи культурадин центрада 30-июндиз кьиле фейи шад мярекатдал вахкана. Фарид Агьмедова аялриз тербия ва чирвилер гайи муаллимриз ва диде-бубайриз чухсагъул лагьана, райондин гьар са агьалиди агалкьунралди кIелзавай аялрал дамахзавайди, абур гележегда мадни виниз тир нетижайрив агакьуник еке умудар кутунвайди къейднай.
«Лезги газет»
