Къурбанд суварин вилик мергьяматлувилин “Инсан” фондуни “Гьар са кIвализ — як” серенжем кьиле тухуниз гьазурвилер аквазва. Идакай фондунин пресс-къуллугъди раижнава.
Къейдзавайвал, фондунин учетда акъваззавай, игьтияж авай агьалийрин кьадар къвердавай гзаф жезва. Апрелдилай инихъ абурун кьадар кьве сеферда артух хьанва. Жуьреба-жуьре себебралди абур недай вири суьрсетрин жигьетдай четинвилерал ацалтнава.
“Къурбанд авунилай гъейри, “Гьар са кIвализ — як” серенжемда иштиракуналди, дарвиле авай агъзурралди инсанриз як пайдай, мергьяматлувал къалурдай мумкинвал жезва. Фондунин векилри эхиримжи 4 вацра 255 тонн суьрсет (12 миллион манат серфна) агьалийриз пайна. Гьавиляй чаз и месэладикай хъсандиз хабар ава. Вири дагъустанвийриз чна мергьяматлувилин “Инсан” фондунин серенжемда иштиракуниз эвер гузва”, — къейдна фондунин векилди.
Алава хъийизвайвал, игьтияж авайбурун кьадар артух хьуниз килигна, алай йисуз 50 тонн як пайиз кIанзава.
«Лезги газет»
