Жасмина Саидова
2024-йисуз, сифте сеферда яз, РФ-дин Президент Владимир Путинан тапшуругъдалди государстводин аттестациядин имтигьанар вахкузвай 11-класс акьалтIарай аялриз цIи чпи хкягъай са тарсунай ЕГЭ-дин имтигьан алава юкъуз — 4 ва 5 лагьай июлдиз — цIийи кьилелай вахкудай ихтияр гана.
Дагъустанда алава йикъара ЕГЭ-дин имтигьан цIийи кьилелай вахкун патал 3589 касди арза гана, абурукай имтигьандиз 3109 кас атана, хабар гузва РД-дин образованидин ва илимдин министерстводи. Малум хьайивал, чпин нетижаяр хъсанарун патал имтигьандиз атай аялрикай муьжуьд кас, къайда чIурун себеб яз, классдай акъудна, 94 выпускникдивай, гьахълу себебар аваз, ам эхирдал кьван акьалтIариз хьанач.
Кухтунвай дегишвилерин бинедаллаз, имтигьандин цIийи нетижа агакьайдалай кьулухъ виликанди къуватдай вегьезва. ЕГЭ вахкузвай чкадиз татай ва я имтигьан вахтунилай фад акьалтIарай выпускникрин виликан къимет (баллар) авайвал амукьзава.
ИкI, министерстводи хабар гузвайвал, алава юкъуз ЕГЭ вахкайбурукай 295 выпускникди (10 процент) чпин виликдай авай нетижа тестикьарна, 2112 иштиракчиди (70 процент) — авайдалай хъсанарна, сад лагьай сеферда хьайи баллрилай тIимил нетижа тахминан 600 (20 процент) выпускникди къазанмишна.
Гьа са вахтунда, Рособрнадзорди хабар гузвайвал, ЕГЭ цIийи кьилелай вахкунин нетижада уьлкведа 122 выпускникдилай 100 баллдин къимет къачуз алакьна. Санлай къачурла, кьвед лагьай сеферда чпин бахтуни гъун ишлемишдай къарар 105 агъзур касди кьабулна — цIи ЕГЭ-дин имтигьанар вахкай гьар ругуд лагьай выпускникди. Репетиторри къейдзавайвал, цIийи кьилелай ЕГЭ вахкудай ихтияр ганвай йикъара абурун игьтияжар садлагьана хкаж хьанвай.
