Дагъустандин аялрин сагъламардай лагерра кьвед лагьай сменадин вахт эхирдал атанва ва пуд лагьай сменадиз худда гьазурвал аквазва.
Кьвед лагьай сменадин вахтунда Дагъустандин лагерра 6000-далай гзаф аялри ял яна. Абурун арада гьакIни Запорожьедин областдин Михайловский райондай ва Белгороддин областдай тир 350 аял ава. Абур асул гьисабдай «Солнечный берег» ва «Аист» лагерра хьана, хабар гузва РД-дин образованидин ва илимдин министерстводин пресс-къуллугъди. Министерстводин тербиядин кIвалахдай ва алава образованидин рекьяй управленидин начальник Лариса Калмыковадин гафаралди, гатун сезондин вахтунда республикадин лагерра 37 агъзурдалай гзаф аялри ял ядайвал я.
Кьвед лагьай смена, къейдзавайвал, машгъулардай ва чирвал гудай девлетлу программадалди рикIел аламукьда. ИкI, «Надежда», «Костер», «Орленок», «Патриот» ва са жерге маса лагерра «IT-технологияр», «КIвенкIвечийрин гьерекат» хилерай, гьакIни спортдиз, искусстводиз ва ватанпересвилин тербиядиз талукь сменаяр хьана. Смена 21 юкъуз давам жезва.
Гьа са вахтунда республикадин лагерри Россиядин цIийи регионрай, гьа жергедай яз, Белгороддин ва Курскдин областрай аялар кьабулун давамарзава. ИкI, пуд гьафтеда давам жедай пуд лагьай сменадиз — ам 23-июлдилай 12-августдалди кьиле фида — Запорожьедин областдай 100-лай гзаф ва Курскдин областдай 200-лай гзаф аялар атанва. Асул гьисабдай абур «Аист», «Солнечный берег» ва «Анжи-Мастер» лагерра ава. Инра аялар патал гьам машгъулардай, гьамни чирвилер артухардай программаяр ишлемишзава.
Курскдин областдин губернатордин везифаяр вахтуналди тамамарзавай Алексей Смирнован тапшуругъдалди региондин образованидин ва илимдин министерстводи дяведин махсус серенжем кьиле физвай мулкунин сергьятдал алай районрай, гьакIни СВО-дин иштиракчийрин хизанрай тир аялар Дагъустандин «Аист» ва «Анжи-Мастер» лагерриз ракъурунин кIвалах кьиле тухвана. Аялар ял ягъиз кьиляй-кьилиз са поездда аваз фин патал абуруз ракьун рекьин гьатта махсус состав — «Курск-Манас» — кардик кутунвай.
«Им сифте сефер яз жезвай кар я. Кьве регьбер — Дагъустандин ва Курскдин областдин — аялриз ихьтин мумкинвал гунин гьакъиндай икьрар хьана, — лугьузва Курскдин областдин образованидин ва илимдин министрдин везифаяр вахтуналди тамамарзавай Наталия Бастриковади. — Физ кIан хьайи вирибур рекье гьатна. Им гзаф итижлу проект я. Умуд кутаз кIанзава, чна и кар анжах башламишзава. Курскдин аялривай Россиядин Федерациядин маса регионрани ял ягъиз жедайвал, чна и рекье кIвалах давамарда».
Гьа са вахтунда, хабар гузвайвал, 26-июлдиз къейдзавай Дагъустан Республикадин Конституциядин йикъан вилик школайрин патав гвай ва шегьеррин къерехра авай аялрин лагерра ватанпересвилин тербия ва Конституциядин бинейрикай чирвилер гунин месэлайриз фикир гуда. ИкI, лагерар неинки ял ядай ва машгъулардай, гьакIни акьалтзавай несилдин гражданвилин кьатIунар арадал гъидай чкайриз элкъуьрда.
Лагерра тарихдин тарсар кьиле фида: аялриз Дагъустандин Конституция арадал атунин тарихдикай, республика ва адан халкьар патал адахъ авай метлебдикай, асул къанунда тестикьарнавай инсандин кьилин ихтияррикай ва азадвилерикай суьгьбетда. Яратмишунин конкурсар — Конституциядиз талукьарнавай шикилар ягъун, шиирар кхьин ва кIелун, ихтияррин рекьяй савадлувал ахтармишдай къугъунар, викторинаяр тешкилда. Идалайни гъейри, лагерра итижлу ксарихъ — Халкьдин Собранидин депутатрихъ, къайдаяр хуьдай органрин къуллугъчийрихъ галаз гуьруьшар кьиле фида. Лагеррин программайрик гьакIни республикадин тарихдиз талукь музейриз фин ква. Сувариз талукь шад гьалар, гьелбетда, концертри, спортдин рекьяй акъажунри давамарда.
Чи мухбир
