Апрелдин эхирра СтIал Сулейманан райондин Вини СтIалрин юкьван мектебда “Илимдиз кам” лишандик кваз математикадай 5-11-классра кIелзавай аялрин арада гьар йисуз кьиле тухузвай олимпиадади цIи 16-сеферда аялриз чпин алакьунар къалурдай мумкинвал гана. Виликан йисара хьиз, цIини ам хъсан тешкиллувал аваз кьиле фе­на. Меценат, технический илимрин доктор, профессор, Москвадин М.В.Ломоносован тIварунихъ галай госуниверситетдин механико-математикадин факультет акьалтIарнавай Абдул Баламирзоеван регьбервилик кваз кьиле тухузвай и серенжемдин макьсад школайра кIелза­вай аялрин чирвилерин ери ахтармишун, математикадин илимдиз аялрин патай итиж артухарун, математикадал рикI алай аялар майдандиз акъудун, абур руьгьламишун, бажарагълубур жа­гъу­рун  тир.

Олимпиада ачухдалди вилик Абдул Баламирзоева виликан йисара кIвен­кIве­чи чкаяр кьур, алай вахтунда ДГУ-дин математикадин факультетдин 1-курсуна кIелзавай рушарив — Зилефат Мегьамедовадив ва Залина Шихнебиевадив — математикадиз итиж авунай 12 агъзур манатдин кьадарда аваз пулдин пишкешар вахкана. Мярекатда РУО-дин начальник Гьуьсейн Шихбабаева ва образованидин управленидин патай жавабдар къуллугъчи Азим Азимова иштиракна. Гь.Шихбабаева олимпиададин иштиракчийрихъ агалкьунар хьун алхишна. Абдул Баламирзоеваз районда просвещенидин кIвалах кьиле тухунай, бажарагъ авай аялрин руьгь хкажунай, математикадин илим вилик тухуник ва машгьуруник ла­йихлу пай кутунай сагърай лагьана.

Абдул Баламирзоевахъ галаз кьиле фейи суьгьбетдай малум хьайивал, олимпиададин тешкиллувилин кIвалах­да цIи­нин йисуз куьмекар гайибурун арада мадни ава: Москвадин М.В.Ломоносован тIва­ру­нихъ галай госуниверситет акьалтIар­навай Гьабибула Гьабибулаев, ДГУ-дин доцент Максим Ризаев ва МАДИ-дин Махачкъаладин филиалдин доцент Даниял Селимханов.

ЦIи олимпиадада 339 аялди иштиракна. Абурукай 1-чкайриз, 3 000 манатдин кьадарда аваз пулдин пишкешдиз ва I дережадин дипломриз 14 аял лайих­лу хьана. Ругуд аялди — 2 ва 16 аялди­ни 3-чкаяр кьуна. Абуруз, талукь тирвал, 2000 ва 1500 манат пул, II ва III дережайрин дипломар гана. Тафаватлу хьайи 33 аял са агъзур ма­нат пул ва грамотаяр­ гуналди къейдна. Гъалиб хьайи аялар Дербент, Каспийск, Махачкъала шегьеррай, гьакI­ни Дербент, Мегьарамдхуьруьн, СтIал Сулейманан районрай тир. Иштиракчийрин арада Ахцегь, Табасаран, Хив, Хунзах, Шамил районрай тир ая­ларни авай.

Олимпиададин спонсорар мергьяматлувилин “Умуд” фонд, “Надежда” ЦОД ва Вини СтIалрин юкьван мектебдин­ директор Расул Къагьриманов тир. И серенжем кьиле тухуз са шумуд йисуз­ куь­ме­кай, алай аямдин акьалт­завай несил патал математикадихъ авай къиметлуви­лин гъавурда авай кас хьайи рагьметлу Мариф Къади­мова тешкилай “ИНТЕХСОФТ” ООО-ди­ спон­сорвал-амадагвал авуна. Эхиримжида олимпиадада виридалайни гзаф баллар (35 балл) къазанмишай кьве аялдиз — Умукусум Башировадиз (11-класс) ва Абубакар Абуба­кароваз (9-класс) — 5 агъзур, Сулейман На­биеваз (ада 33 балл къазанмишна) 3 агъзур ма­нат­дин кьадарда аваз кьилдин пишкешар гана.

Алатай йисара хьиз, цIини олимпиада тешкилунин ва кьиле тухунин кIвалах­­да СтIал Сулейманан райондин администрацияди ва образованидин управленидини еке куьмекар гана. Гъалиб хьайи аялрив шабагьар “ИНТЕХСОФТ” ООО-дин общественностдихъ галаз кIва­­лах тухунин рекьяй векил Къудрат Алиева вахкана.

Рагнеда  Рамалданова,

Къудрат  Алиев