Савадлувилин рекьяй лезгияр чи уьлкведа вад лагьай чкадал алайдакай и мукьвара интернетдин сетра хабар чкlан­вай. Шак гъиз жедай делил туш. Гьакъикъатдани, кьадардал гьалтайла гъвечlи хал­кьарик акатзавай чи миллетдихъ вини дережадин пешекарар, илимдин рекье зурба кукlушар муьтlуьгъарнавай ватанэгьлияр тlимил авач. Инал, гзафбур къейд тавуртlани, Россиядин сергьятра илимрин виридалайни жегьил доктор Заур Алисултанован тlвар кьун бес жеда. Амма и сеферда зи ихтилат Красноярскда авай лезги дишегьли алимдикай я.

Илимдин рекье агалкьунралди зегьмет чlугвазвай лезгийрикай чав уьлкведин саки гьар са пипlяй хабарар агакьзава. Гьа ихьтин лайихлубурукай сад 2012-йисалай В.П. Астафьеван тlварунихъ галай Красноярскдин госпедуниверситетдин социально-гуманитарный технологийрин институтдин директордин заместитель яз кlвалахзавай Агъаева Индира Бабаевна я.

Индира Агъаева Дербент шегьерда дидедиз хьана. 1988-йисуз ада и шегьердин 15-нумрадин мектеб, 1994-йисуз педучилище тафаватлудаказ куьтягьна, “мектебда кlел­дай яшдив агакь тавунвайбурун тешкилатдин тербиячи” пеше къачуна. Чирвилер артухарунин, илимдин рекье ку­кlушрихъ финин мурад авай Индира Бабаевнади 1997-2000-йисара «психологиядинни педагогикадин муаллим» пешедай ДГУ-да тафаватлудаказ кlелна. Агалкьунралди вуз куьтягьай йисуз ам аспирантурадикни экечlна. Алакьунар авай жегьилди акьулдин жигьетдай гуьгъуьна амай аял­риз чирвилер ва тербия гунихъ галаз алакъалу месэлаяр илимдин рекьелди ахтармишна.

Сифте пеше къачурдалай кьулухъ 1994-йисалай ада Дербентдин 51-нумрадин аялрин бахчада тербиячи, 1997-йисалай и шегьердин 7-нумрадин махсус (коррекционный) мектебда муаллим яз кlва­лахна.

2004-йисуз кьисметди Индира Агъаева Красноярск шегьердиз акъудна. Илимдин гурарай хкаж хьунин кар ада гъурбатдани давамарна. Икl, 2005-йисалай ада Красноярскда В.П. Астафьеван тlвару­нихъ галай госпедуниверситетдин коррекционный педагогикадин кафедрада кlвалахзава. 2006-йисуз педагогикадин илимрин кандидатвилин диссетрация хвена. Коррекционный педагогикадин кафедрадин рекьяй ада 2011-йисуз ВАК-дин доцентвилин тlвар къачуна.

Вичин пешедин вири сирерай кьил акъудиз алахъзавай лезги алимди 2013-2016-йисара Санкт-Петербургда А.И. Герценан тlварунихъ галай Россиядин госпедуниверситетдин магистратурада кlелна. Кьетlендаказ къейд ийиз кlан­зава, Индира Бабаевнади кlе­лай вири чкаяр тафаватлудаказ куьтягьна. Ада 2017-йисуз В.П. Астафьеван тlвару­нихъ галай госпедуниверситетдин илимдинни педагогикадин работникрин конкурсда «КГПУ-дин йисан доцент” номинацияда сад лагьай чка кьуна. Адаз жуьреба-жуьре конференцийра, конкурсра тешкилатчивилин кlва­лахар тамамарунай, университетдин уьмуьрда активдаказ иштиракунай чухса­гъул­дин хейлин чарар ганва.

Индира Агъаевадин бу­байрин ватан Хив райондин Цлахъ­рин хуьр я. Ам Дербентда яшамиш жезвай вичин диде-бубадин патав гьар гатуз хквезва. Илимдин рекье адахъ мадни еке агалкьунар хьун чи мурад я.

Куругъли Ферзалиев