Чи ватанэгьлияр — гьар сана

Мукьвара чав мад са жегьил алимдин агалкьунрикай малуматар агакьна. Ихтилат вичин ери-бине Докъузпара райондин Мискискарин хуьряй тир Жафаров Ренат Фаргьадовичакай я. Ам 1997-йисан 2-июлдиз Донецк шегьерда дидедиз хьана. 2003-йисуз хайиди тир Докъузпара райондин Мискискарин хуьруьз хтана.

Ренат гъвечIи чIавалай кIелунал рикI хьуналди, вич чешнелудаказ тухуналди тафаватлу жезвай. Мектебда кIелай вахтунда ада датIана олимпиадайра иштиракзавай. 10-классда авайла, ада химия­дай Вирироссиядин олимпиададин рес­публикадин паюна 2-чка кьуна. Гуьгъуьн­лай ада 11-классда кIелзавайбурун арада «Физтех» олимпиададин заочный паюна вичихъ хъсан чирвилер авайди успатна ва адаз Астрахань шегьерда кьиле фейи очный паюниз теклифна.

2013-йисуз Рената мектеб къизилдин­ медалдалди куьтягьна. Гьа и йисуз ам Моск­вада кардик квай, И.М.Губкинан тIвар­цIихъ галай Россиядин нафтIадинни газдин госуниверситетдин (НИУ, нацио­наль­ный исследовательский универси­тет) бакалавриатдик экечIна. НафтIадинни газдин буругъар эгъуьнуниз талукь кафедрада­ 5 йисуз тамам чирвилер къачур Ренат Фаргьадовичакай яру дипломдин сагьиб хьана.

2017-йисуз ингилис чIалай международный IEITS имтигьан агалкьунралди вахкунин нетижада ам «Газпром» ПАО-дин, Австриядин нафтIадин OMV тешки­лат­­дин, Леобендин дагълух университет­дин ва И.М.Губкинан тIварцIихъ галай Рос­сия­дин нафтIадинни газдин госунивер­ситетдин арада илимдинни техникадин­ рекьяй саналди кIвалахунин гьакъиндай хьайи икьрардин бинедаллаз­ туькIуьрнавай магистрдин программадиз кьабулна. Къейдна кIанда хьи, тIварар кьунвай университетринни тешкилатрин векилрикай ибарат комиссиядин вилик имтигьандай акъа­туни чи ватанэгьлидихъ вичи хкянавай рекьяй хъсан чирвилер, гележегда мадни еке кукIушрив агакьдай мумкинвилер авайвилин гьакъиндай шагьидвалзава. «Газпром» ПАО-дин патай такьатар къачурдалай кьулухъ магистрдин программадай ада 2 йисан къене тамамдиз ингилис чIалал тарсар кьиле физвай вузра кIелна: сад лагьай йисуз — Москвада, кьвед лагьай йисуз — Австриядин Леобен шегьерда. Кьве уьлкведа чирвилер къачунихъ галаз алакъалу яз дипломдин кIвалахни ада 2019-йисуз кьве вуздани хвена. Магистратурани ада яру дипломдалди акьалтIарна.

Алакьунар авай пешекар международный вири проектрал машгъул «Газпром Интернэшнл» тешкилатда кIвалахал кьабулна. Сифтедай пешекар яз зегьметдив эгечIай Ренат Жафаров буругъар­ туь­кIуьрунин технологиядин отделдин кьилин пешекардин дережадиз акъатна.

2021-йисуз Р. Жафаров «Газпром ВНИИГАЗ» ООО-ди жегьил алимринни пешекаррин арада тешкилай илимдинни техникадин эсеррин конкурсда «Газдин хиле информатизация ва автоматизация» номинацияда гъалиб хьана.

2024-йисуз Ренат Жафарова илимдин рекье мад са важиблу кам къачуна: «Оптимизация режима бурения скважин на шельфе долотами PDC на этапе планирования» темадай И.М.Губкинан тIварцIихъ галай Россиядин нафтIадинни газдин гос­университетда техникадин илимрин кан­ди­датвилин диссертация хвена. Жегьил­ алимдин илимдин кIвалах буругъар эгъуь­нунин карда тIебии тушир акьулдикай мен­фят къачуниз талукьди я. Ада наф­тIа­динни газдин буругърал машгъул инженерар патал къурулуш туькIуьрнава.

«Газпромда» кIвалахай вахтунда ам Бангладешда, Вьетнамда кIвалахдин рекьяй командировкайра хьана.

Жуьреба-жуьре чешмейра илимдин 20-далай виниз макъалаяр чапнавай­ алимди алай йисан гатфарилай «Геонавигация» тешкилатда буругъар эгъуьнунин отделдин делилар анализ ийидай пешекар яз зегьмет чIугвазва. Чаз адахъ кIвалахдин, илимдин рекье мадни еке агалкьунар хьана кIанзава.

К.Ферзалиев