Чи ватанэгьлияр — гьар сана
ТIвар-ван авай духтур, Москва шегьердин са МО-дин депутат, чи дуст Загьир Хидирович Агъамова медицинадин илимда мад са кукIуш муьтIуьгъарна: 6-февралдиз РУДН-да (Россиядин халкьарин дуствилин университет) ада «Организационные технологии совершенствования первичной медико-санитарной помощи взрослому населению при переходе к общей врачебной практике в условиях крупного города» темадай медицинадин илимрин докторвилин диссертация агалкьунралди хвена.
Ам 1979-йисуз Мегьарамдхуьруьн Хъартас-Къазмайрал дидедиз хьана. Алай вахтунда Москвадин 115-нумрадин поликлиникада духтур-уролог, Н. Семашкодин тIварцIихъ галай сагъламвилин рекьяй илимдинни ахтармишунрин милли институтдин илимдин чIехи къуллугъчи яз кIвалахзавай Загьир Агъамован агалкьунрикай, ада дагъустанвияр патал медицинадин рекье кьилиз акъудай проектдикай, ватанэгьлийриз гузвай куьмекрикай чна газетда алатай йисарани куьруь макъалаяр чапнай. Ватанэгьлидикай за жуван «Баркаллу лезгияр» ктабдани гегьеншдаказ кхьенва.
Уьлкведин меркезда кIвалахзаваз, Загьир духтур 5 йис идалай вилик Дагъустанда «Сагълам уьмуьр» проект кьилиз акъудунив эгечIна ва ам нетижалудаказ тамамарна. Чи рикIелламайвал, адан сергьятра аваз уьлкведин меркездай са десте духтурри-пешекарри чи республикадин дагълух ва яргъал хуьрерин агьалийрин сагъламвал ахтармишна, уьзуьррин вилик пад вахтунда кьадай мумкинвал гана; медицинадин рекьяй куьмекарна, чкайрал сагълам хъийидай мумкинвилер авачир дуьшуьшра бязи начагъбур пулсуздаказ меркездиз рекье туна.
Федеральный дережадин медицинадин идарайра жуьреба-жуьре пешейрай кIвалахзавай тежрибалу духтурар желбуналди, агъзурралди дагъустанвийрин (Дербент, ЦIумада, ЦIунтIи, Агъул районра, Хъартас-Къазмайрал ва масанра) сагъламвилиз килигунин, абуруз хийирлу меслятар ва куьмекар гунин мергьяматлу серенжем чаз чидай тарихда мад малум туш. Тешкиллувилин, къастунал кIевивилин лишанар хас хьунилай гъейри, сагъламвилин проектдин кьиле акъвазай Загьир Хидировича гзафбуруз ватанпересвилин чешнени къалурна.
Чна Загьир духтурдиз илимрин докторвилин тIвар рикIин сидкьидай мубаракзава. Къуй ам мадни еке дережайрив агакьрай!
К. Ферзалиев
