2025-йис чи уьлкведа Ватан хуьзвайбурунди ва ЧIехи Гъалибвилин 80 йисан юбилейдинди яз малумарнава. И вакъиайрин лишандик кваз РД-дин «Женгинин стхавал» тешкилатдин Ахцегь райондин отделенида нубатдин мярекат кьиле фена.
Адан кIвалахда СВО-да неонацистрихъ галаз къизгъин женгера Ватан патал чанар гайи рухвайрин диде-бубайри, Афгъан дяведин иштиракчийри, райондин общественный тешкилатрин векилри иштиракна. «Женгерин стхавал» отделенидин кьил Руслан Сулейманова, СВО-да игитвилелди телеф хьанвай аскерар эбеди рикIел хуьнин лишан яз, са декьикьада кIвачел акъвазун малумарна.
— Ихьтин лишанлу мярекатралди чна эвелимжи нубатда чи азадвал таъминарзавай игитар рикIел хуьзва, абурун диде-бубайрин рикIериз теселли, абуруз алакьдай куьмекар гузва, акьалтзавай несил ватанпересвилин руьгьдаллаз тербияламишзава, — лагьана, Сулейманова дяведа гъалибвал мукьвал авун патал чи гадайрин кьегьалвилерикай ихтилатна.
Ахпа Руслан Сулейманова «Женгинин стхавилин» тешкилатдиз кьабулнавай ксарив документар вахкана. Ингье абур.
Хъуьлуьдви Садранова Перихан, республикадин «Дидейрин къуват» тешкилатдин Ахцегь, Докъузпара, Рутул районрин хилен председатель. 25 йисаваз телеф хьайи викIегь хва Садранов Мегьамед Робертовичан диде. Каспийскдин флотилиядин аскер тир адаз «Жуьрэтлувиляй» орден ганва.
Ахцегьви Гьуьсейнов Сефербег Гьуьсейнович. Дондал алай Ростов шегьердай фена, «Шторм» ротада къуллугъдайла телеф хьайи игит аскер Гьуьсейнов Гьажидин буба.
Рутулви Гьасанов Мафарадж Гьасанович. Калмыкиядин Лаген шегьердай фена, гьуьгьуьллувилелди СВО-дик экечIна, ЛНР-дин Макеевка шегьер патал женгера телеф хьайи сержант, инженеринни сапёррин ротадин отделенидин командир, «Жуьрэтлувиляй» ордендин сагьиб Гьасанов Радикан буба.
Луткунви Алиев Тофик Мусаевич — Афгъан дяведин ветеран.
Эминов Раидин Гьамидович, пенсияда авай журналист-блогер.
Мярекатдал «Женгинин стхавал» тешкилатдин векилар Ахцегь райондин Общественный палатадин председатель Шемсидин Арухов, Абдулмежид Эмирбегов, Баламет Велиев, Юсиф Саркаров, и цIарарин автор ва Ахцегь РВК-дин къуллугъчи Динара Гьажиназарова рахана.
Абурун вирибурун фикирар сад тир. Дагъустан, Россия — чи умуми кIвал я. Вирибурун сад тир къуватралди ам хуьнни авуна кIанда. Ватандин ЧIехи дяведин ветеранрин баркаллу крарилай чешне къачуналди, къе СВО-да женгер чIугвазвай, Ватан патал чанар къурбандзавай кьегьал рухвайрин тIварар эбеди авун чи буржи я. Абурун хизанрин гъил кьун, акьалтзавай несил хизандани, школадани, общественный чкайрани ватанпересвилин руьгьдаллаз тербияламишун — и ва маса месэлаяр акъвазнава чи уьлкведин, жемятдин вилик.
Къейдин, «Женгинин стхавал» отделениди СВО-дин иштиракчийриз мергьяматлувилин куьмекарни ийизва. ИкI, 2024- йисан декабрдин вацра Донбассдиз 26 ящик недай-хъвадай суьрсет ва гужлу генератор ракъурна. Исятда Ахцегь, Мегьарамдхуьруьн, СтIал Сулейманан районри ва Белиж посёлокдин, Дербент, Махачкъала шегьеррин юлдашрин иштираквални аваз, «Газель» машин ацIай недай суьрсетни майишатдин метягьар гьазурзава.
Дашдемир Шерифалиев
