Гзаф дикъетлу ва игьтиятлу хьана кIани аям я къенинди. Россиядин агьалияр патал алай девир иллаки муракабдаз элкъвенва. Чи япарихъ мукьвал-мукьвал ина-ана, жуьреба-жуьре регионра «террористар кьуна», «диверсантар кьуна» ва ихьтин маса нагьакьан ванер галукьзава. Фендер къурмишиз кIан­за­вайбур, вирибур гъавурда акьазвайвал, Украинадин махсус къуллугъри гьалдарзавайбур, тайин тапшуругъар хиве туна, ракъурза­вай­бур я. Нин кьил акъатзавайди я къе вуж катнавайди, вуж чIуру къаст рикIе авайди ятIа?

“Ракьун перде” авадарзавай Рагъ­акIидай патан уьлквейри чаз алакьдай жуьредин вири фендер къурмишзава. Садбур къабачивилин амалриз ухшарбур жезва.

Дуьздайни какурдай кьил акъу­­­­дун гьамиша регьят жезвач. Ихь­тин­ хци макъамра чи ФСБ-дин ва къуватдин муькуь органри тухузвай кIва­лахрихъ еке метлеб ава. Са тIи­мил бушвал хиве кьур­­­тIа­, уьл­кведа­ гъулгъула гьатун мум­­­кин туш ни лу­­гьуда? Амма ми­дяйризни чиз­вай­ди я чпин му­ра­дарни макьсадар регьятдиз кьилиз акъудиз тежербур тирди, гьатта чеб макьсаддив агакьдалди д­а­гьар­ризни фурариз аватунин къурхулувални та­хьа­на туш. ГьакI ятIани, гузвай тапшуругъар инкариз тежезвайбурни, миллетбазвилин азар квайбурни тIимил авач эхир. Ибур тIебии гьерекатар хьиз кьабулна кIанзава.

РагъакIидай пата урус меденият арадай акъудунин, ам рикIелай ракъурунин, михьиз къадагъа авунин жигьетдай авур алахъунар не­ти­жасузбур яз амукьна. Гьахълу чешмейри тестикьарзавайвал, акси яз, урус музыкадиз, операдиз, эде­бият­диз ийизвай итиж дуьньяда авайдалайни артух хьана. ВЦИОМ-ди (Же­миятдин фикирар чирдай вирироссиядин центр) кьиле тухвай ха­ба­рар кьунин серенжемдин нети­жай­рал асаслу яз, чIехи пай рос­сия­вияр чIа­лахъ я хьи, урус меденият та­хьай ми­сал ийиз кIан хьунин гьере­катар кьилиз акъат тийидайбур я, гьикI хьи, урус медениятдихъ гьар са аксивилиз дурум гуз жедай къуват ава.

Польшада Россиядин музыка ва пьесаяр къадагъа авунва. И уьлкведин филармонийра, театрра Россиядин писателрин, медениятдин деятелрин эсерар эхцигдач. Бя­зи уьл­квейра гьатта Россиядин тIуьн­рин тIварар дегишарзава (чеб къадагъа ийизвач, амма тIварар де­ги­шарзава). Ахтармишунри тести­кьар­­навайвал, Европада вирибур урус медениятдикай къерех жез гьа­зур туш. Гьа са вахтунда Рагъ­акIи­дай патан гзаф сиясатчийри, ме­деният­дин деятелри чеб урус ме­деният къадагъа авунин серенжемриз акси я лагьанва. Абуру чпин уьлквейрин туьквенрин дезгейрилай Достоевскийдин, Толстоян ва масабурун эсерар алудун дуьз кар туширди къейдзава. Гьатта­ Италиядин медениятдин министр­дини уьлкведи урусрин эсеррал сер­гьятар эцигунин тереф хуьзвач лагьанва.

РФ-дин Госдумадин депутат Е.Драпекодин фикирдалди, эхиримжи кьве асирда Европадани Америкада Россиядин медениятди кьетIен чка кьуна. Урус медениятди вири дуьньядиз таъсир ийизва. Гьавиляй РагъакIидай патавай аксивилер ийиз жедач.

И жуьредин вири гьерекатри РагъакIидай пата къалурзавай ниф­ретлувилин дережаяр чирзава. Донбасс миллетбазрикай азадунин макьсаддалди чи уьлкведи тухузвай СВО абур патал хъсан багьнадиз элкъвенва. Гьавиляй абурай акъат тийир кар жеч. Садани уяхвал квадарна кIандач.

К.Ферзалиев