Чи уьлкведин халкьар патал виридалайни багьа, чIехи, важиблу сувар тир Гъалибвилин югъ мукьва хьурдавай Дербентда адаз талукьарнавай гьазурвилерни гегьенш жезва. Шегьердин ветеранрин советди и кIвалахдиз иллаки гзаф фикир гузва. Гьамиша адет хьанвайвал, ветеранрин советди ЧIехи Гъалибвилин 74 йис тамам жезвай сувариз талукь яз кьиле тухудай шад мярекатрин махсус план туькIуьрнава, ам ветеранрин советдин Президиумдин заседанидал тестикьарнава.
Планда Ватандин ЧIехи дяведа чи игит Яракьлу Къуватри, Советрин халкьди къалурай тешпигь авачир хьтин кьегьалвилерикай мектебра, кьилин ва юкьван образованидин кIелунрин идарайра ветеранрин гуьруьшар тешкилуниз иллаки гегьенш чка ганва. Мектебра игитвилин тарсар (уроки мужества) тухунив эгечIнава. СтIал Сулейманан тIварунихъ галай 21-нумрадин юкьван мектебда и кIвалах иллаки хъсандиз тешкилнава. Ана Гъалибвилиз талукьарнавай Баркалладин кьилдин зал ава. Игитвилин тарсарни гьа ина тешкилзава. ЧIехи сувар мукьва жердавай шегьердин женгинин баркалладин музейдиз къвезвайбурун кьадарни артух хьанва. Аниз къвезвай мектебрин аялри экспонатриз итиж ийизва.
Ватандин ЧIехи дяведин йисара Дербентда 345-нумрадин стрелковый дивизия арадал атайди я. Вичин жергейра гзаф миллетрин векилар аваз хьайи и дивизияди, Кавказдилай гатIунна, чи уьлкведин гзаф шегьерар ва хуьрер душмандикай азад хъувунин пак кардик вичин пай кутуна. Кьегьал дербентви, Женгинин Баркалладин ордендин вири пуд дережадизни лайихлу хьайи, дяведилай кьулухъни Дербентдин горпромкомбинатда уьмуьрдин эхирдалди зегьмет чIугур Иван Хоролецан игитвилериз бахшнавай махсус стенддин вилик музейдиз сиягьатзавайбур яргъалди акъваззава.
Суварин вилик квай и йикъара шегьердин мектебрин аялри, аваданламишдай карханадин коллективди Ватандин ЧIехи дяведа телеф хьайи, гьакIни гуьгъуьнин йисара рагьметдиз фейи фронтовикрин сурарихъни гелкъуьн тешкилнава, цуьквер цазва, кул-кусдикай, кьуру векьер-кьаларикай михьзава.
Шегьер Ватандин ЧIехи дяведин иштиракчияр тир дербентвийрин портретралди ва махсус плакатралди безеклу авунин кIвалахарни гъиле кьунва. Сувариз талукьарнавай шад мярекатар кьиле тухуниз шегьердин культурадин маканарни тешкиллувилин хъсан дережада аваз гьазур жезва. Кьилди къачуртIа, СтIал Сулейманан тIварунихъ галай музыкадинни драмадин, табасаранрин ва азербайжанрин драмадин театррин, “Дербент” тIвар алай муниципальный, шегьердин аялринни жаванрин яратмишунрин (ДДЮТ) дворецдин, “Гюнеш” ансамблрин коллективри чIехи программайрикай ибарат суварин концертар гьазурзава.
Шегьердин центральный библиотекада Ватандин ЧIехи дяведа дербентвийрин гьунарлувилериз талукь материалрин ва ктабрин выставка тешкилнава, “Дербентвияр — Советрин Союздин Игитар” фотомонтаж туькIуьрнава, кIелзавайбурунни ветеранрин гуьруьшар кьиле тухузва. Мукьвара шегьерда “РикIел хуьнин вахтни” башламишдайвал я.
Нариман Къарибов
