Ван авуна
Дяведин вахтунда чи халкьарин, уьлкведин кьилел атай тутугайвилерикай, гъам-хажалатдикай, баркаллу, кьегьал гзаф аскерар игитвилелди телеф хьайи женгерикай чаз тарихдин документрай, газетринни журналрин макъалайрай, шаирринни писателрин эсеррай аквазва.
2021-йисан 3-июндиз “Лезги газетдин” 22-нумрада Герейханован хуьруьн Р.Османован тIварунихъ галай 1-нумрадин юкьван школадин дидед чIаланни литературадин муаллим Османова Сегьерханум Рашидовнади шаир ва публицист Мердали Жалилован “Бубадин шинель” поэмадиз талукь яз кхьенвай макъала гзаф итижлуди ва таъсирлуди хьана. Авторди вичин макъаладиз “Игитвилин шинель” тIвар ганва. Поэмадин кье-тIенвилер, кьилин игитрин къаматар, абурун суьретар, дяведин къизгъин вакъиайрин гьерекатар кIелзавайди гъавурда акьадай чIалалди устаддаказ ачухарнава. Дугъриданни, ивидин лекеяр алай, гуьллейри тIеквенар акъуднавай, руквадинни мекьи хъуьтIерин ни галамай Ватандин ЧIехи дяведин йисарин бубадин шинель гьакъикъатда чIехи ирс, тарих, къенин ва къвезмай несилриз игитвилин лишан, чешне тирдал шак алач!
Поэмада, макъаладай аквазвайвал, автордин буба Абдулазиза кьетIен чка кьазва. Ам дяведин хейлин медалриз лайихлу хьана, гьа жергедай яз — “Кавказ оборона авунай”. Адан имидин хва Желил лагьайтIа, 14 хер алаз, инвалид яз хтана.
Ватандин ЧIехи дяве — им виликан Советрин уьлкведин халкьарин дуствилин, стхавилин, игитвилин рикIелай тефидай лишан я. И кардин гьакъиндай дяведин женгерилай кьулухъ шинелдал аламай Белоруссиядай тир дуст Петродин ивидин гелерини шагьидвалзава. Акор, Алеша, Барджи, Петро ва икI цIудралди мад дяведин женгерин стхаяр яз хьайи аскерри Сталинград, Смоленск, Витебск, Варшава, Кенигсберг шегьерар душмандикай азадна.
1418 юкъузни йифиз кьиле фейи дяведин къизгъин женгера Советрин уьлкведин миллионралди аскерри игитвилелди чанар гана. Абурун кьегьалвилер чи рикIера гьамишалугъ яз амукьда.
Макъаладин автор С.Османовади устаддаказ кьиле тухузвай тарсара акьалтзавай несилдик ватанпересвилин, инсанпересвилин гьиссер, къагьриманвилин, игитвилин руьгь кутазва.
Гьакъисагъ зегьметдин рекье къуй адахъ мадни еке агалкьунар хьурай!
Жемиля Багъишева,
Вини СтIалрин СОШ-дин муаллим
