Са шумуд югъ идалай вилик Ахцегь районда “Сад тир Россия” партиядин куьмекни галаз Россиядин Игит Нурмегьамед Гьажимегьамедован экуь къаматдиз бахшна азаддаказ кьуршахар кьунай (2006-2007 ва 2008-2009-йисара дидедиз хьайибурун арада) республикадин турнир кьиле тухвана. Ана республикадин шегьеррайни районрай тир 150-далай виниз жаванри иштиракна.
Акъажунар ачухуниз талукьарнавай мярекатдал рахадайла “Сад тир Россия” партиядин чкадин отделенидин исполнительный секретарь Гъалиб Агьмедова жаванрихъ агалкьунар хьун алхишунихъ галаз сад хьиз, Нурмегьамед Гьажимегьамедов хьтин кьегьалар анжах несилрин арада сих алакъа авай, дагъвийрин пак адетрал кIевелай амалзавай, чIехиди-гъвечIиди чидай гьуьрметлу хизанрай акъатзавайди, Игитди Россиядин ва Дагъустандин ислягь гележег патал вичин чан къурбанд авурди къейдна.
Турнирда гъалиб хьайи спортсменрин арада СтIал Сулейманан райондин спортдин, туризмдин ва жегьилрин крарин рекьяй Комитетди рекье тунвай командадик квай Агьмед Абдуллаев (48 кг) ва Агьмед Велиметов (55 кг) 1-чкайриз лайихлу хьана. Ислам Рамазанова ва Назим Келбялиева (кьведани 52 кг заланвал авайбурун арада) 3-чкаяр кьуна.
Гъалибчийриз ва призерриз медалар, грамотаяр, кубокар ва пулдин пишкешар гана.
Рагнеда Рамалданова
