Алатай кишдиз, хъуьтIуьн мекьи юкъуз, Махачкъалада, руль хуьз тахьана, муркIадилай КОР-диз (Октябрдин революциядин къанал) аватай машиндай инсанар акъудай «халкьдин къутармишдайбурун» кьегьалвиликай, жуьрэтлувиликай телевиденидин каналрай ва мессенджеррай, ида-адаз рекье тваз, видеояр виринриз чкIана. Циз аватнавай машин акурла, мусибатдин дуьшуьш арадал атуникай хуьн патал тадидаказ куьмекдиз атайбурукай сад Алимирзе (Мирзе) Наврузбегов тир. СтIал Сулейманан райондин Алидхуьрелай тир ам вичин хизанни галаз меркезда яшамиш жез кьве йис кьван я.
— Заз акуна хьи, машин цин кIаниз физва, ана авай дишегьлидик къалабулух акатнава. Заз гьасятда циз хкадариз кIан хьана, амма са тIимил чкадилай турба фенвай, куьмекдиз атай муькуь жегьилди аял анлай кьуна акъудун кьетIна. Им хъсан фикир тир. Аял акъуднамазди, яргъалди фикир тавуна, за циз хкадарна. Инал кIватI хьайи ксарикай сада вичин машиндай гьасятда трос акъудна, страховка патал ам гъилел алчудна. Машиндин ракIар агал хьанвайвиляй дишегьли дакIардай юкьвал кьван экъечIнавай. Гъил кьуна, ам ялиз эгечIна. Ахпа вирида, трос ялиз, дишегьли цяй акъудна. Гуьгъуьнлай водителни гьа и тегьерда акъудна. Аллагьдиз шукур, ихьтин вахтара чи халкьди садвал къалурда, вирида куьмекна. Абур къутармишиз гьазур тир ксар тIимил тушир, амма зун чкадал фад агакьна, — суьгьбетна А. Наврузбегова.
Къутармишнавай ксар тади гьалда патав гвай кIвалера яшамиш жезвайбуру хутахна. Медицинадин куьмек агакьдалди, абурал кьурай пек-партал алукIна.
Гуьгъуьнлай, къутармишай аялдин бубадин суьгьбетдай чир хьайивал, таксидиз эвер гана, адан ирандиде Хадижат ва адан хва Муртузали азарханада и йикъара операция авунвай гъвечIи хцин патав физвайбур тир.
Алимирзе Наврузбегова, гьакI амай кьегьалрини, кIеве гьатай инсанар акурла, къайи цихъайни, арадал атун мумкин тир чIуру крарихъайни кичIе тахьана, чеб тухвай тегьерди, са шакни алачиз, хизанда хъсан тербия ганвайди къалурзава. Алидхуьрел кIвал-югъ кутуна, гьакъисагъ зегьметдалди къазанмишнавай фу незвай Зейдуллагь ва Марият Наврузбеговрин хизанда аялрив, хтулрив чешнелу тербия агакьарзавайди заз мадни субутариз кIанзава. Алимирзедихъ пуд аял ава. ЧIехи хва Юнуса 7-классда кIелзава. Вичин сагъламвал гуьнгуьна хтун патал Мансур Бремоваз пул кIватIзавай вахт тир. Юнуса вичи ва стхадини ваха къугъунрин машгъулат (плейстейшен) маса къачун патал «копильникда» кIватIзавай пул начагъ аялдиз гунин къарар кьабулна. Аялри 25 агъзур манат кIватIнавай кьван…
Мадни са кардикай хълагьин — рикIин михьивилелди авур хъсанвал квахь тавуникай. Хабар гьинай? Аялри «копильникда» кIватIнавай пул чпин хушуналди мергьяматлувилин рекье харж авунвайди раиж хьуникай. Алай аямда телефонри чаз и рекьяй гзаф куьмекзавайди инкариз жедач. Гьа икI, аялри чпиз къугъунардай машгъулат маса къачузвай пул начагъ аялдиз ганвайди чир хьайила, Астрахандай тир мергьяматлу са касди 125 агъзур манатдин къимет авай плейстейшен маса къачуна, абуруз багъишна.
«Къутармишдайбурун серенжемдал» хквен. Чаз чир хьайивал, жегьилрин жуьрэтлувални фикир тагана тадач. Газетдин 2-чина абур шабагьар гун патал къалурнавайдакай кхьенва. Абурукайни чна мукьвара, иншаллагь, муштулухар гуда.
Регина Семедова
