Хейлин мулкар азаднава

РФ-дин Яракьлу Къуватрин Генштабдин начальник Валерий Герасимова малумарайвал, январдин сифте йикъарилай чи кьушунри инсанар яшамиш жезвай 17 пункт азаднава ва махсус серенжем кьиле физвай мулкарин вири терефра гьужумдин женгер давамарзава. Идакай «РИА Новости» чешмеди хабар гузва.

«Чи  гуьзчивилик  500  кв. километрдилай­  гзаф  мул­кар акатнава. Купянск-Узловой азаднава, исят­да шегьердин магьалар ахтармишзава, михьи ийиз­­ва», — лагьана В. Ге­расимова.

Ада чи аскерри Ковшаровка ва Глушкова хуьрера дяведин гьерекатар физвайдакай, Оскол вацIун рагъэкъечIдай патан къерехда мидядин кIеретIар тергзавайдакай ва чибур Ковалевка галайвал еримиш жезвайдакай ихтилатна.

«Рубцовский ва Краснолиманский районрин мулкара агалкьунралди гьужумдин гьерекатар кьиле физва. 25 лагьай армиядин подразделенийри Красный Лиман ва Ильичевка азад авун патал куьчейра женгер кьиле­ тухузва. «Пак дагълар» тIвар алай милли паркунин мулкара Украинадин кьушунрин кIеретIар тергун давам жезва», — алава хъувуна Генштабдин начальникди.

РФ-дин оборонадин министерстводи хабар гузвайвал, «РагъэкъечIдай пад» кьушунрин дестеди Днепропетровскдин областдин Александровкадин, Запорожьедин областдин Риздвянка, Зализничное, Горькое, Воздвижевка, Верхняя Терса хуьрерин мулкара ВСУ-дин 2 механизированный, гьужумдин 2 бригадайриз ва гьужумдин пуд полкуниз бегьем ягъунар кьуна. Анжах 27 январдиз и женгера ВСУ-дин кьушунрикай 390-далай гзаф аскерар хкатна, дяведин мягькемарнавай        8 машин ва 21 автомобиль тергна.

Евросоюздиз герекзава

НАТО-дин генеральный секретарь Рюттеди малумарнавайвал, США-дай яракьар агакьариз тахьайтIа, Украина хуьз хьун мумкин туш. «РИА Новости» чешме­да журналист Петр Акопова къейднавайвал, ев­ро­павий­рин макьсад нетижада Украина Европадин,­ Ев­ро­со­юз­дин пай яз тестикьарун я. «Украина патал ийиз­вай дяведиз виш миллиардралди еврояр серфнава­, европавияр мад триллиондилай гзаф гьакъи гуз гьазур я. Бес вири пулуни гьялзавани? Ваъ, дяведин­ гьерекатар­ патал яракьарни герек я эхир, Европади­ лагьайтIа, абур США-дивай маса къачузва. Яни Штатри Европадиз Украина къачуз (къуй еке пуларихъ хьурай) куьмек гузва лагьай чIал жезвани? Амма и кар США-дин куьз герек я? Мегер США-диз Евросоюз мягькем ва къуватлу­ хьана­ кIанзавани? Гьеле Трамп сад лагьай сеферда президент хьайила, ада гегьенш тушир майданра Евро­со­юз­дикай авур ихтилат, кьилди къачуртIа, ЕС терг хъувун герек я лагьай фикир раиж хьанай. Гьа чIавалай инихъ Трампа ЕС-дихъ галаз авай алакъаяр дегишарнавач – адан терефдарриз Европа «чпиз муьтIуьгъ жедай тегьерда туьхкIуьриз» кIанзава», — кхьенва Акопова.

Жаваб гегьеншди жеда

США-ди гьужум авуртIа, Иранди гудай жаваб тIвар паталди ваъ, гегьеншди жеда. Ихьтин гьерекатри дяведик цIай кутун мумкин я. Ихьтин фикир «РИА Новости» чешмедиз хатасузвилин месэлайрай туьркерин пешекар М. Бёгюрджюди лагьана.

Багьаз акъваззава

Словакиядин премьер-министр Роберт Фицодин фикирдалди, Европадин союз Россиядин газдивай къерех хьун энергетикадин жигьетдай жува жуваз къаст авур мисал я. Адан гафар «РИА Новости» чешмеда чапнава.

Алатай ислендиз ЕС-дин Советди чапнавай малуматдал асаслу яз, 2027-йисан 1-январдилай Россиядин газ маса къачунал къадагъа эцигнава.

«Квез зи фикир чизва хьи, им акьулсузвилин къарар я ва и кар чаз багьаз акъвазда. Квез чизва хьи, Словакиядин мулкарай тухузвай Россиядин газ акъвазарун чаз бегьем зарар гайи сад лагьай кам хьана. Ихьтин къарар Украинадин президентди акъудна ва и кар чаз йисан муддатда 500 миллион евродай акъваззава», — лагьана Фицоди Словакиядин ТАЗ телеканалдай къалурай пресс-конференциядал.

Къейд ийин, виликдай Россиядивай маса къачузвай газ Словакиядив Украинадин мулкарай агакьарзавай. 2025-йисан 1-январдилай Украинадин гьукумдарри и кар акъвазарнай. Алатай йисан 1-февралдилай Словакияди Россиядин газ маса къачунин савда «Туьркиядин турбадай» са кьадар гуьнгуьна хтуна.

«Лезги газет»