29-октябрдиз Сулейман-Стальский райондин Ичинрин хуьре диндин межлис кьиле фена. Ана Кьиблепатан Дагъустанда республикадин Муфтийдин патай тамам ихтиярар ганвай векил Магьди гьажи Абидова, жемиятдин хатасузвал хуьнин рекьяй Сулейман-Стальский райондин администрациядин кьилин заместитель Юзбег Юзбегова, Чепелрин, Зизикрин хуьруьн мискIинрин имамри — Юсуф Къурбановани Мегьамеднаби Сафаралиева ва масабуру иштиракна.

Мярекат лезги чIалал акъатзавай «Ассалам» газетдин редактор Гьасан гьажи Амаханова кьиле тухвана.

Диндин межлисдин сергьятра аваз чкадин жемятдин вилик рахайбуру «Ислам ва терроризм» сад-садаз къарши манаяр авай гафар тирдакай, къанунрал амал тийизвайбуру кьиле тухузвай гьерекатар диндихъ галаз алакъалу туширдакай, капI авун гьар са мусурмандин буржи тирдакай лагьана. Абуру иштиракчийрин вилик «чун и дуьньяда вуч патал яшамиш жезва?» суал эцигна ва са мус ятIани чунни и дуьньядай хъфидайди рикIел хкана.

Юсуф Къурбанова мярекатдин иштиракчийрихъ Ислам диндай гьихьтин чирвилер аватIа тайинарун патал «Суал-жаваб» викторина кьиле тухвана. Гъалибчияр савкьатриз лайихлу хьана.

Къейд ийин хьи, Сулейман-Стальский районда ихьтин мярекатар мукьвал-мукьвал кьиле физва. Мисал яз, 21-октябрдиз диндин межлис НуьцIуьгърин хуьрени тешкилнавай.

«Лезги газет»