Лезгийрин машгьур спортсмен, Европадин чемпион Даурен Куругълиева нубатдин сеферда Дагъустандин Халкьдин Собранидин Председатель Хизри Шихсаидован савкьатар патал азаддиз кьуршахар кьунай тешкилай вирироссиядин турнирда гъалибвал къачуна.

Лагьана кIанда, турнирда къецепатан уьлквейрай ва Россиядин регионрай атанвай спортсменри иштиракна. Абурун кьадар 219-дав агакьнавай. Акъажунрин кьилин савкьат KIA Rio маркадин машин тир. Амни Даурен Куругълиеван кьисметдиз атана.

Къейж ийин хьи, Даурена и турнирдин кьилин савкьат вахчуз кьуд лагьай йис я. Виликдай ам «Лада Гранта» (2014), «Ниссан Алмера» (2015) и «Фольцваген Поло» (2016) маркайрин машинриз лайихлу хьанай.

Чна чи викIегь стхадиз агалкьун мубаракзава ва адахъ спортдин рекье мадни еке кукIушар муьтIуьгъардай мумкинвилер хьана кIанзава.

«Лезги газет»