Лезги чилер, лезги хуьрер — кIанда килигдай вилер.
Чан Лезгистан, вун я тарихдин дастан.
Бегьерлу чил авай халкь, жемят бахтлуди я.
Багъри ерияр кIан тахьайтIа, абуруз вунни кIан жедач.
Ваз халкьдин дердияр такуртIа, халкьдиз вунни аквадач.
Багъри ватан, диде хьиз, ширин жеда.
Ватан инсан патал рикIни жигер, акьалтI тийир ашкъини кIанивал я.
Ватан патал чанни гьайиф къведач.
Ватандал рикI алайди межлисдин кьиле жеда.
Ватандал рикI алайди уьтквем жеда.
Ватандал рикI хьун къагьриманриз хас я.
Багъри ерийриз вафалуди халкьдиз багьа, ала жеда.
Ватандиз икрам тавуртIа, лазим макъамда ам вазни куьмекдиз къведач.
Багъри ерийриз, жуван жемятдиз къуллугъ авун гьар садан пак буржи я.
Ватандикай лагьай мани эбеди гимн хьиз я.
Багъри ерийрин гьавади начагъди сагъар хъийида.
Ватандин рагар, къванер-рикIиз куьн гьикьван аквада иер!
Багъри ерийрихъ, дидедихъ хьиз, вил жеда.
Ватан, хайи ерияр багьа кас такабурлу жеда.
Виртдай чIижни зегьметдал рикI алай инсан сад я.
Жув багъри жемятдиз бакара къведай инсан хьунилай еке бахт авач.
Зегьмет кIаниди масадан гъилиз килигдач.
Намуслу зегьметдин нетижа аваданвал я.
Халис итим кIвалахда, зегьметда чир жеда.
Йисаралди тахьай кар йикъаралди дуьз жеда.
ГьакI куьчейра къекъуьналди, фу жагъидач.
КIвалахзавайдан берекат адан гуьгъуьна аваз къведа.
Муьгъ эцигайдан тIвар амукьда.
Авадан хуьр — гумадилай, аваран ким къайдадилай чир жеда.
Хуьр авадан авуник, яшайиш гуьзелди хьуник жуван пайни кутур.
Ватан — къуват, ватан — къудрат.
Ватан — лайлай, ватан — мани.
Ватан — дидени буба, ватан — кьебни тахт.
Ватандин накьвар — чандин цукIвар.
Гъалибвилер женгерани кIанда, зегьметда, кIвалахда, яшайишдани.
Гъалибвал чанда жигер авай касдивай къазанмишиз жеда.
Гъалибвилер галачиз яшайиш вилик фидач.
Гъалибвилери инсандикай игит ийида.
Жуван гъвечIи ватан чIехи ватандилай ширин жеда.
ГъвечIи ватан чIехи ватандин бине я эхир.
Жемятдиз кIан хьайитIа, литинин хакни чилиз фида.
Жемятдихъ галаз санал пашман юкъузни дерт-гъам алахьда.
Регьбер авачир чкада къекъверагар — гзаф, яшайишни четин жеди.
Багъри ерийрин къванерни ви даяхар я.
Хайи чил — бубайрин бине, дидейрин диге.
Халкь, жемят кьегьалри хкажда.
«Лезги газет»
