Инсандин сагъламвал хуьн ва мягькемарун медицинадин хилен работникрин кIвалахдилайни аслу я. Абуруз хуьрера кутугай къулай шартIар яратмишунихъ, медицинадин идараяр герек тадаракралди таъминарунихъ еке метлеб ава. И рекьерай, гьакIни хуьрера фельдшервилинни акушервилин пунктар (ФАП-ар) эцигунал гьалтайла, Сулейман-Стальский районда еке кIвалах тухузва. ИкI, Кьулан СтIалрин хуьре эцигзавай ФАП цIи ишлемишиз вахкун пландик ква.
2017-йисан эхирра капитальнидаказ ремонт хъувурдалай гуьгъуьниз Агъа СтIалрин-Къазмайрин ФАП ишлемишиз вахкана. ЦIийи шартIара кIвалах гьикI тешкилнаватIа чирунин мураддалди чун чкадал фена. Чаз акурвал, ана гзаф кIвалахар авунва.
— Хуьруьнвийрин арза-ферзе, наразивал себеб яз, Дагъустандин Кьиблепатан территориальный округда РД-дин Кьилин патай тамам ихтиярар авай векил Энрик Муслимова (а чIавуз), райондин кьил Нариман Абдулмуталибова ФАП капитальнидаказ ремонт хъувунин кIвалах вилик тухвана, — лугьузва анин заведующий Асият Оружевади. — И кардай чна абуруз, гьакIни эцигунрин, ремонтрин кIвалахра куьмекар гунай Ражидин Агьмедоваз, Загьир Гьажимирзоеваз, райондин центральный больницадин кьилин духтур Максим Ханбалаеваз, эцигунардайбурун бригададиз чухсагъул лугьузва. Абурун къайгъударвилин нетижада чаз кIвалахдай къулай шартIар ва мумкинвилер хьанва.
Мукьувай таниш хьайила, чир хьайивал, Асият Оружевади (шикилда) 1983-йисуз Астраханда медучилище акьалтIарна. ЦIийи поселокдин медпунктуна медсестравиле, Герейханован хуьруьн 2-отделенидин ФАП-дин заведующийвиле кIвалахна. 1985-йисалай Агъа СтIалрин-Къазмайрин фельдшервилинни акушервилин пунктунин заведующийвилин везифаяр тамамарзава.
— Чи ФАП-да медицинадин рекьяй кьилин ва махсус пешекарвилин образование авай 5 касди кIвалахзава, — суьгьбетзава А.Оружевади. — Абуру хуьре яшамиш жезвай 2896 касдиз медицинадин рекьяй къуллугъзава. Ремонт хъувурдалай гуьгъуьниз чахъ 4 кабинет хьанва. ФАП медицинадин тадаракралди, дарманралди, рапаралди, герек маса шейэралди таъмин я, экуьвал ва чимивал ава. Ида чи вилик агьалийрин сагъламвал хуьнин ва мягькемарунин кIвалах мадни хъсанарунин везифаяр эцигзава. Чи медработникар кIвалахдин рекьяй тежриба авай, хиве авай везифайрив жавабдарвал гьиссуналди эгечIзавай пешекарар я. Умудлу я, чалай хуьруьнвийрин патай гьуьрмет къазанмишиз алакьда.
Чун фейила, участковый терапевт Муминат Омаровади яшлу дишегьлидин сагъламвал ахтармишзавай. Ада 1989-йисуз Дагъустандин медицинадин академия акьалтIарна. Адалай инихъ Агъа СтIалрин-Къазмайрин агьалийрин сагъламвал хуьнин къуллугъда акъвазнава. 1989-йисуз Дербент шегьердин медицинадин училище акьалтIарай Лафира Гьасанбеговади ФАП-да акушерка яз кIвалахзава.
— Хуьруьн агьалийрикай 1434 кас дишегьлияр, абурукайни 487 аялар хадай яшара авайбур я, — лугьузва ада. — Сагълам аял сагълам дидеди хада. Гьавиляй чна дишегьлийрин, гьакIни бицIекрин гьакъиндай кьетIен къайгъударвалзава. Ида хъсан нетижани гузва. Хазвай аялрин кьадар артух жезва. Дидеяр ва бицIекар кьейи дуьшуьшар тахьана са шумуд йис я. Алай вахтунда чи учетда кIвачел заланзавай 17 дишегьли ава. Абур чи гьар йикъан кьетIен гуьзчивилик ква. Дишегьлийрин сагъламвилин гьал хъсанзава.
Хуьре 622 аял ава. Абурукай 544 14 йисал къведалди яшара авайбур я. Аялрин сагъламвал хуьн ва мягькемарун патал тежрибалу духтур-педиатр Сижарат Къазанбеговади ва вичихъ кIвалахдин 30 йисан тежриба авай аялрин медсестра Бесханум Эседовади намуслудаказ зегьмет чIугвазва.
Фельдшервилинни акушервилин пункт авай гьалдилай, медработникрин кIвалахдилай чун рази яз амукьна. Умуд кутаз кIанзава хьи, Агъа СтIалрин-Къазмайрал хьтин шартIар райондин амай хуьрерани жеда. Райондин кьиле авай ксари ийизвай къайгъударвал, кьилиз акъудзавай кIвалахар и кардин замин я.
Хазран Кьасумов
