Заз Сулейман-Стальский райондин Герейханован 1-хуьруьн агьали Рагьимханов Зейдулагь чиз гзаф йисар я. Адан дах Иседулагь Ватандин ЧIехи дяведин иштиракчи, 5 веледдин буба, зегьметдал рикI алай кас тир. Ада вичин веледарни зегьметдал рикI алаз вердишарна.
Зейдулагь 1957-йисуз дидедиз хьана. Сифте хуьре 6-класс акьалтIарна, диде-бубадиз гьар жуьредин куьмекар гуз, абуру буюрмишай кIвалахар кьилиз акъудна. 1975-йисуз, 18 йис тамам хьайила, жегьил Туьркменистандин Безмеин шегьердиз акъатна. Ана бетондин блокар гьазурдай заводда рабочий яз кIвалахна. Са куьруь вахт арадай фейила, ам Советрин Армиядин жергейриз фена. Ватандин вилик буржи кьилиз акъудна, 1977-йисуз хтана. Ам ЦIийи Уьзен шегьердиз фена. Ана, кIвалахни ийиз, шофервилин курсар кIелна. Гуьгъуьнлай ина 11-класс акьалтIарна, заочнидаказ кьилин образованини къачуна. 1987-йисуз З.Рагьимханов Герейханован хуьруьз хтана, Кьасумхуьруьн автотранспортдин карханада шофервиле кIвалахна. Чернобылда, 1986-йисуз, АЭС хъиткьинайла, радиациядин амукьайрикай михьун патал райвоенкоматдай Зейдулагьни аниз рекье тунай. Герейханован хуьруьн цIудралди жегьилри ана намуслувилелди зегьмет чIугуна.
Зейдулагьа эвел кьиляй амукьаяр тухудай машиндал кIвалахна. Гуьгъуьнлай радиацияди тади гайи ам штабдиз рекье туна. Штабда начальникдин машиндал кIвалахна. Йиф-югъ талгьана, зегьмет чIугур З.Рагьимхановаз вичин вилик эцигнавай везифаяр намуслувилелди кьилиз акъудунай Гьуьрметдин грамота ганай, виридан вилик чухсагъул малумарнай. Чернобылдин АЭС-дал са шумуд вацра кIвалахайдалай кьулухъ ам кIвализ рахкурнай.
1991-йисуз З.Рагьимханова Рязанский областда Песочинский хуьруьн майишатдин техникум заочнидаказ акьалтIарна. 1994-йисуз Кьасумхуьруьн автотранспортдин идарани чкIана, мад кIвалах амукьнач.
Чернобылдин 2-группадин инвалид тир Зейдулагь Рагьимханов алай вахтунда ЦIийи Мамрачрик яшамиш жезва. Ам гьуьрметлу инсанрикай сад я. Ада жемятдиз вичивай жедай гьар жуьредин куьмекар гузва. Ам 3 веледдин буба, са шумуд хтулдин чIехи бубани я.
Къейд ийин хьи, а хаталу чкада зегьмет чIугур адаз гьукуматдин патай са жуьрединни кьезилвилер авач.
Вадим Жамалдинов
