Инсанриз яшайишда чарасуз герек объектар кардик кутунин, авайбур хъсанарунин, цIийи тадаракралди таъминарунин, куьмек авунин игьтияж авайбурун гъил кьунин месэлаяр датIана фикир гана кIанзавайбур я. Хуьрера кардик квай ФАП-рин идараярни кар алайбур, агьалийрив медицинадин рекьяй эвелимжи куьмек агакьарзавайбур я.
Халкь патал менфятлу серенжемрик кьил кутазвай ватанэгьлийрин кьадарни югъ-къандавай артух жезва. ИкI, Сулейман-Стальский райондин Агъа СтIал-Къазмайрин хуьруьн агьали Загьир Гьажимирзоева хайи хуьруьн ФАП-дин дарамат ремонт авуник вичин пайни кутуна. Мергьяматлу ватанэгьлиди вичин патай 100 агъзур манат пул чара авуна. И такьатрихъ дараматдин къенепатан кIвалахар (сувагъунар, ширер ягъун) кьилиз акъудна.
РикIел хкин, Сулейман-Стальский райондин 90 йисан юбилей къейд авунин сергьятра аваз, “Райондин юбилейдиз — 90 мергьяматлу кар”, серенжем кьиле тухузва. Райондин администрациядин пресс-къуллугъдин векилри хабар гузвайвал, мумкинвилер ва къастар авай ватанперес хейлин агьалийри адак кьил кутазва.
«Лезги газет»
