Малум тирвал, алай йисан 1-июлдилай государстводин ва муниципальный къуллугъар кьилиз акъудзавай МФЦ-дин идарайра агьалийрин чарчин документрин электронный жуьреяр туькIуьрдай мумкнивал ава. Къейд ийин, и къуллугъ анжах агьалийрин чпин тIалабуналди тамамарзава.
Чарчин документрин электронный дубликатар “Госкъуллугъар” порталдин хсуси кабинетда хуьда. Электронный жуьредин документар гьазурнавай касди гележегда МФЦ-диз ва я гьукумдин органриз гьакъикъи документар (оригинал) къалурун герек амукьдач.
Къведай йисан цIийивилер
РФ-дин Гьукуматди хабар ганвайвал, 2022-йисуз “Госкъуллугъар” порталда пуд цIийивал (сервисар) пайда жеда:
“Чарар-цIарар галачиз инсанар ва парар санай масаниз тухун” — улакьрин чарар-цIарар, путевкайрин листер, пар тухудай ихтиярар гудай (туькIуьрдай) махсус сервис;
“Рекъемрин эцигунар” — эцигунрин рекьяй са жерге къуллугъар (куьмекар) къачуз жедай сервис;
“Зегьметдин онлайн миграция” — кIвалахдай чка-яр жагъуриз ва кIвалахдин жигьетдай онлайн-суьгьбетар тухуз жедай сервис.
Ибурулайни гъейри, къведай йисуз “Вуздик онлайн къайдада экечIун”, “Онлайн къайдада зегьметдин алакъаяр” сервисрин мумкинвилер гегьеншарда. Къведай йисуз государстводин вири вузар онлайн къайдадин сервисдик кутадайвал я.
* * *
Алай йисан 16-ноябрдилай коронавирусдиз акси раб янавай агьалийривай QR-кодни галаз чарчин сертификат къачуз жеда. Ихьтин малумат уьлкведин Гьукуматдин кьил Михаил Мишустина малумарна.
ТIвар кьунвай документ къачун патал МФЦ-дин идарадиз фин герек жеда. Раб янавай вирибуруз сертификат гузва. Ам “Госкъуллугъар” порталда кардик квай хсуси кабинетра жезва. Эгер коронавирусдиз акси раб янавай кас порталда регистрация хьанвачтIа, и карни адавай МФЦ-дин пешекаррин куьмекдалди кьилиз акъудиз жеда.
QR-код алай сертификатдин чарчин жуьре асул гьисабдай смартфонар авачир, электронный къуллугърикай менфят къачуз вердиш тушир яшлу инсанриз герек жезва.
«Лезги газет»
