И мукьвара зун Махачкъалада авай сагъламвал гуьнгуьна хутадай “Тарнаир” центрада хьана. 2006-йисалай кардик квай ина республикадин агьалийри медицинадин рекьяй чпин сагъламвал гуьнгуьна хутазва, и жигьетдай жуьреба-жуьре серенжемрикай менфят къачузва.
“Центрада медицинадин рекьяй ва маса пешейрин сагьибар тир 200 къуллугъчиди зегьмет чIугвазва. Азарлуйрин уьмуьрдин ери хъсанарунин рекье тупламиш хьанвай ксарин сих кIватIал. И рекье виридалайни еке къимет азарлуйрин ихтибарлувал я” — ихьтин келимайрилай башламиш жезва “Тарнаир” санаторийдин сайтда компаниядикай суьгьбет. Заз къе и гафарин гьахълувал тестикьариз, гьакIни ина жувахъ галаз алакъалу хьайи вири пешекарриз, кьилди къачуртIа, зун чпин къайгъударвилелди са кьадар тажубарай Айгуьн Азизовадиз ва Патимат Магьмудовадиз рикIин сидкьидай чухсагъул лугьуз кIанзава.
Азизова Айгуьн Аскеровнадин ери-бине Азербайжан Республикадин КцIар райондай я. Ина руш инсанпересвилелди тербияламишай диде-буба яшамиш жезва. Медучилище акьалтIарай Айгуьна зегьметдин рехъ аялрин сарарин духтурдин медсестравилелай башламишна. “Тарнаирда” ада кIвалахиз 10 йис хьанва. Алай вахтунда ам ина физиотерапиядин процедурайрин медсестра я. “Инсанрин сагъламвилин къаравулда акъвазун зи бахтлувал я”, — инанмиш я Айгуьн Аскеровна.
Магьмудова Патимат Абдулбакировна Ахвах райондин Тукита хуьряй я. Буйнакскдин училище акьалтIарай ада 1990-йисалай инихъ медсестра яз кIвалахзава. “Тарнаир” санаторийда зегьмет чIугваз 10 йисалай гзаф вахт я.
“Азарлуйрин гуьгьуьл къачун, гафуналди сагъар хъувун, инсандиз шадвал гун — ибур зи пешедин кьилин везифаяр я”, — лугьузва Патимата. Адан гафар тестикьарун яз, къейд ийин хьи, Патимат Абдулбакировнади инсанрихъ галаз ийизвай рафтарвал, абурув эгечIзавай тегьер заз гзаф бегенмиш хьана.
Республикадин гьар жуьре районрай къвезвай ксарив, бязи вахтара чарасуз лазим жезвай и ва я маса шейэр (месела, телефон зарядка ийидай алат, тапочкаяр) гвачиз, гъун фикирдай акъатнаваз жезва. И кар малум хьайила, Патимата, вичин кIваляйни кваз гъана, лазим жезвай шей вугузва, пишкешзава. Гьелбетда, и карди азарлуйрин рикIер шадарзава, абурун гуьгьуьлар ачух жезва.
Заз къе хайи газетдин куьмекдалди и рушариз мад сеферда чухсагъул лугьуз кIанзава. Регьимлу рикIер авай, хъуьтуьл къилихрин, масадан къайгъударвал ийидай инсанар тербияламишнавай абурун диде-бубайриз баркалла!
Абдулашим Гьажимурадов,
Муьгъверганрин хуьр
