Алатай гьафтеда Москвада Урусатдин журналистрин Союзди тешкилнавай “Урусатдин къизилдин къелем” (“Золотое перо России”) тIвар алай премия вахкуниз талукьарнавай мярекат кьиле фена. Шад жедай кар ам я хьи, лауреатрин арада чи машгьур ватанэгьли, ДГУ-дин электронный СМИ-рин кафедрадин муаллим Алик Абдулгьамидовни авай.
“Урусатдин къизилдин къелем” премия пешекарвилин лайихлувилерай, прессадин хиле гзаф йисара зегьмет чIугунай ва санал кIвалахзавай юлдашрин арада еке гьуьрмет, кесер хьунай гузва. Алай йисуз 6 номинациядай и премиядиз 28 журналистни яратмишдай кьве коллектив лайихлу хьана.
“Журналистика жемиятдиз са къерехдихъай вичиз килигдай мумкинвал гун, чун гьиниз физватIа, чун авай гьал гьихьтинди ятIа къалурун я. Журналистикадал чан аламай кьван чи уьлкведиз мадни хъсан, агьалияр патал генани къулайди жедай мумкинвал ава. Гьайиф хьи, бязи дуьшуьшра журналистдин гаф репортердин уьмуьрдай я. Дагъустанда яшамиш жезвай чаз и кар хъсандиз чизва: эхиримжи цIуд йисара республикада къадалай виниз журналистрин чандиз къаст авуна.
Четинвилеризни килиг тавуна, кIвалах давамарзавай, жемиятдиз къуллугъзавай гьар садахъ заз агалкьунар хьана кIанзава”, — лагьана Алик Абдулгьамидова, премия вахчудайла.
Машгьур журналистдиз кIвалахдин рекье хьанвай еке агалкьун Дагъустандин Кьилин везифаяр вахтуналди тамамарзавай Сергей Меликова мубаракна.
“Аликбер Абдулгьамидович Абдулгьамидоваз чIехи ва кесерлу премия мубаракунал зун шад я. Ам чи еке, жуьреба-жуьре миллетар яшамиш жезвай уьлкведин виридалайни хъсан журналистриз гузва.
Дагъустанвийриз и бажарагълу публицистдин, хайи чилин ватанпересдин яратмишунрин рехъ хъсандиз чизва. Аликбер Абдулгьамидовича вичи хкянавай кIвалахдиз намуслувилелди къуллугъ авунай чешне къалурзава.
Заз чи ватанэгьлидихъ мягькем сагъламвал ва цIийи агалкьунар хьана кIанзава”, — кхьенва республикадин Кьилин тебрикдин чарче.
Къейд ийин хьи, Алик Абдулгьамидов Дагъустандин журналистрикай “Урусатдин къизилдин къелем” премиядиз лайихлу хьанвай сад лагьай кас я. РикIел хкин, алатай йисуз чи республикадин журналистрикай сифте яз Алик Абдулгьамидоваз Урусатдин Гьукуматдин премияни ганай.
“Лезги газетдин” редакциядин коллективди чи къелемдин юлдашдиз нубатдин агалкьун рикIин сидкьидай мубаракзава, адахъ чандин сагъвал ва кIвалахда мадни еке агалкьунар хьана кIанзава.
Агьмед Магьмудов
