Са шумуд югъ идалай вилик Хасавюртда, Гь.Гьамидован тIварунихъ галай спортдин дворецда, азаддаказ кьуршахар кьунай жаванрин арада Дагъустандин кIвенкIвечивал патал акъажунар кьиле фена.
Ана республикадин районрайни шегьеррай тир 400-дав агакьна жаванри гьасиррал чпин устадвал къалурна. Акъажунрин макьсад спортдин и жуьредай алай вацран юкьвара гьа ина кьиле фидай СКФО-дин кIвенкIвечивиле иштиракдай виридалайни викIегь спортсменар (заланвилин 10 категориядай, вири санлай — 60) хкягъун тир. Дагъларин уьлкведа спортдин и жуьредиз хас тирвал, гьасиррал бягьсерни къизгъиндаказ кьиле фена. Виридалайни хъсан нетижаяр Махачкъала, Хасавюрт ва Къизилюрт шегьеррин жаванри къалурна.
Шадвилелди а кардикай хабар гуз кIан-зава хьи, и акъажунра Дербент райондин Белиждин жаванрини хъсан нетижаяр къалурна. Чаз малум хьайивал, Белиж поселокдин 2-нумрадин ДЮСШ-да тренер Мингьажудин Къазиеван гъилик вердишвилер къачузвай 3 спортсменди кIвенкIвечи чкаяр кьуна. ИкI, Адам Ремиханов (75 кг) -1, Умудбег Агъаширинов (62 кг) ва Алимирзе Абдулкъадиров (85 кг) 2-чкайриз лайихлу хьана. Гила абур пудни СКФО-дин кIенкIвечивал патал акъажунриз гьазур жезва. Виликди, кьегьалар!
Рагнеда Рамалданова
