И йикъара Чувашиядин меркез Чебоксары шегьерда единоборствойрин милли жуьрейрай Виридуьньядин I-къугъунар кьиле фена. Ана дуьньядин 17 уьлкведай тир 2000-далай виниз спортсменри иштиракна.
Чи уьлкведин Президент Владимир Путина къугъунрин тешкилатчийрин, иштиракчийрин ва мугьманрин тIварунихъ Чар рекье тунвай. Единоборствойрин милли жуьрейрай I къугъунар тебрик авунихъ галаз сад хьиз, ана мадни кхьенвай: «Россиядин ва дуьньядин маса уьлквейрин женгинин искусстводин жуьрейрал машгъул ксар Чувашиядин меркез Чебоксары шегьерда виридалайни викIегьбурун тIвар къазанмишун патал кIватI хьанва. Са майдандал машгьур спортсменри хьиз, чпихъ бажарагъ авай жегьилрини чпин устадвал ва алакьунар къалурда. Умудлу я, Виридуьньядин къугъунри единоборствойрин милли жуьреяр вилик тухуз, жуьреба-жуьре халкьарин арада асирралди авай дуствилин алакъаяр мягькемариз ва сагълам уьмуьр кьиле тухуниз итижзавай ксарин кьадар артухариз куьмекда. Къуй спортсменрихъ агалкьунар, бягьсериз тамашзавайбуруз итижлу легьзеяр кьисмет хьурай!»
Шадвилелди мадни а кардикай хабар гуз кIанзава хьи, Дагъустандин хкянавай командадик кваз иштиракай чи спортсменрини ана хъсан нетижаяр къазанмишна. ИкI, СтIал Сулейманан райондин спортдин, туризмдин ва жегьилрин крарин рекьяй комитетди хкяна рекье тунвай командадик квай са шумуд касди ММА-дай ва грэпплингдай кIвенкIвечи чкаяр кьуна. ИкI, тренерар тир Буба Бабаеван ва Камиль Абдурагьманован гъилик устадвал хкажзавай Низами Эфендиева (72 кг), Сулейман Кьадиева (80 кг), Межведил Ибрагьимова — 1 ва Амрид Эседова 3-чкаяр кьуна.
Хъсан нетижаяр Мегьарамдхуьруьн райондин ЦIийи Гъепцегьрин ва КьепIир-Къазмайрин хуьрера тренер-муаллим, джиу-джитсудай дуьньядин са шумудра чемпион Эйнар Экберован гъилик чпин устадвал хкажзавай Имам Абдулгьалимова (65 кг-дин заланвал авайбурун арада грэпплингдай — 1 ва джиу-джитсудай 3-чкаяр кьуна), Сеферулагь Абасова (51 кг-дин заланвал авайбурун арада джиу-джитсудай — 1 ва ММА-дай 2-чкаяр кьуна) ва Закир Аскеровани (60 кг-дин заланвал авайбурун арада грэпплингдайни ММА-дай 1-чкаяр кьуна).
И къугъунра Дербентда яшамиш жезвай чи ватанэгьлийрини чпин устадвал къалурна. ИкI, Мурад Бейболаева (35 кг) ММА-дай — 1 ва Ферзулагь Исмаилова (65 кг) грэпплингдай 2-чкаяр кьуна. Вичин ери-бине Мегьарамдхуьруьн райондин Билбил-Къазмайрилай тир Ислам Алиева (ада тренерар тир Осман Гьажимусаеван ва Раиф Къурбанисмаилован гъилик вердишвилер къачузва) 39 кг-дин заланвал авайбурун арада ММА-дай 1-чка кьуна. Чаз чир хьайивал, Ислам ММА-дал машгъул жез са йис я. Икьван гагьди ада вичин къуватар спортдин маса жуьрейрай ахтармишна, агалкьунарни къазанмишна. Алай вахтунда ада Дербентдин 16-нумрадин мектебда 8-классда кIелзава.
Рагнеда Рамалданова
