Зенд
Несилрилай несилрал агакьиз, Ахцегьрин ичерин машгьурвал давам жезва. И магьалда битмиш жезвай ичерин тIям тафаватлуди хьун, зи фикирдалди, накьвадихъ, гьавадин шартIарихъ галаз алакъалу я. Масанра гьава чIурузвай гзаф вахтара ина гуьлуьшан жеда. Мисал яз, октябрдин эвел кьилера Махачкъаладай Самур дередиз хъфидай рекье виринра гьава чIимел жуьрединди тир: чка-чкайра чиг къвазвай, циф авай, ракъинин нурар гьич санани акьазвачир. Самур вацIаллай муькъвелай Самур дередихъ хъфейлани, сифтедай гьалчIай гьава авай. Ахцегьар алай чка аквадай дугунив агакьайла, чаз цав михьи яз акуна. Гьава хуш тир, Ахцегьар ракъинин кIаник квай. Ихьтин ажайиб чка тирвиляй я Ахцегь Гьажиди вичин «Ахцегь» шиирда кхьенвайди:
«Гьайиф Бакуда фейи къар,
ХупI гуьзел ватан я и хуьр».
И йикъара Ахцегьа нубатдин сеферда ичерин сувар кьиле фена. Къадим хуьруьн куьчеяр ал яру ва къацу ичерикай туькIуьрнавай гьамбарри, выставкайри кьунвай. И районда цIийи жуьредин багълар кухтунвайдакай газетдай идалай вилик хабар ганай.
Аквазвайвал, хуьруьн майишатдин месэлайриз, милли медениятдиз, хъсан адетриз, хайи чIалаз райондин регьбер Абдул-Керим Палчаева кьетIен фикир гун кьетIнава. И жигьетдай шагьидвалзавай са делил яз лугьун хьи, машгьур скульптор Шариф Шагьмарданова Шарвилидиз туькIуьрай чIехи памятник цIи шад гьалара ачухна. Чаз малум хьайивал, къведай йисалай «Шарвили» эпосдин сувар, виликдай хьиз, Ахцегьа гегьеншдиз кьиле тухуник цIийи кьилелай кьил кухтадайвал я.
Йисан сифте кьилера малум хьайивал, райондин регьберди, вирибуруз хайи чIалал рахунин патахъай эвер гунихъ галаз сад хьиз, хуьрерин мектебра гьар вацра лезги эдебиятдин векилриз талукь межлисар, аялрин арада конкурсар кьиле тухунин теклифни ганай.
Лезги Фетгьуьллагь
