Сулейман-Стальский райондин школайра ва маса коллективрани карханайра чна, 1990-йисуз тешкилнавай «Куьредин ярар» тIвар алай культурадин макандин векилри: Шихнебиев Нажмудина, Агьмедпашаев Агьмедпашади, Камилов Абидина, гьабурухъ галаз зани, чи шиирар гваз экъечIиз, мярекатра иштиракзавай, школайра кIелзавай аялрикай алакьунар авайбур жагъуриз, майдандиз акъудзавай.
И сеферда, туькIуьрнавай пландин бинадаллаз, чи коллективдин иштиракчияр, кьиле машгьур писатель Абдулбари Магьмудовни аваз, ЦIийи хуьруьн школадин мярекатдиз атанвай. Кьиле директор, тешкилатчи аваз, са шумуд муаллимдини чи мярекатда иштиракзавай. Абурун арада, заз гуьгъуьнлай чир хьайивал, Тамила Хаспулатовани авай. Мярекатра са шумудра акунатIани, адахъ галаз мукьувай таниш хьун заз кьисмет хьаначир.
Амма Иседуллаев Агьмедуллагь заз мукьва кас хьиз акахьна, чир хьана. Чи чирхчирвални жувахъ “Жигули” машин аваз хьуналди тир. Чи хуьруьн агьалийрин арада машинар авайбур, зунни кваз пуд кас тир. Маларин духтур Гьарун, тракторист Шихмегьамед ва «копейка» авай зун. А вахтара, машинар ремонтдай мастерскояр авачиз, зун са шумудра Каспийск шегьердиз физ, хтанай. Са юкъуз заз Кьасумхуьруьн муькъуьн вини пата, цIийиз кутунвай хуьруьн ПМК участокда, машинар ремонтдай, гьатта алай ширер цIийи хъийидай мастерской ачухнава лагьана, ван хьана.
Зи шадвилин а кьил авачир. Сад ава ван хьун, садни — жуван вилералди акун. Гьална за жуван «копейка» дуьз и мастерской ачухнавай чкадал. Зун хьиз, инал мад инсанар кIватI хьанвай. Вири рахунрик квай, амма вичел мешребар алай, ацIай лацу якIарин, пагьливандиз ухшар авай са жегьилди кIвалахзавай. Машиндиз килигдай нубат зал 8 касдилай гуьгъуьниз агакьун лазим тир. Амма и юкъуз зал нубат атанач. Пакадин юкъуз лагьайтIа, заз Агьмедуллагьахъ галаз таниш жедай, мастерской туькIуьрдай ихтиярар къачун патал кIватIай кьван документрикай, бюрократри авур инжиклувилерикай яргъалди суьгьбетардай мумкинвал хьана. Хъсан пешекар хьиз, къени къилих, хъуьтуьл мез авай, сивел хъвер алай кас тир адал за мажал хьайи гьар сеферда мукьвадал хьиз, кьил чIугвадай.
Инсанар я, кьисметар я, къе акурди, пака ахкван тийидай. Са сеферда кьил чIугур чIавуз, мастерскойдин варарни сергьят кIевирнавай цацарин жугъунни агалнаваз акуна. Къуншияр тир церин идарадин векилривай хабарар кьурла, Агьмедуллагь са вацран вилик рагьметдиз фенвайди чир хьана. Гьайиф хьи, завай адан юлдашдиз, акахьна течирвиляй, адет тирвал, фена баш сагъ хьурай лугьуз хьанач.
…Инсанар гьамиша саламат яз амукьдач, амма Агьмедуллагь ва адан уьмуьрдин юлдаш, неинки тек са зи, гьакI чи райондилай къеце патара авайбурун рикIерани багьа, чеб кIанардай къилихрин инсанар яз ама. Къуй, чпин сурара нурар хьана, женнетдин иесияр хьурай! Агьмедуллагь хъсан пешекар ва Тамила хъсан муаллим яз, тарсар гайи аялрин, райондин муаллимрин чIехи коллективдин къуллугъчийри, гьар сеферда, абурукай ихтилатар кватайла, чими келимайралди рикIел хкизва.
Сажидин Саидгьасанов
