Чи гъиле авай делилрай аквазвайвал, къадим заманайрилай эгечIна, лезги литературадин процессда дишегьлийрини активнидаказ иштиракнава. Чпин уьмуьрдикай ва яратмишунрикай малуматар чав агакьнавай дишегьли шаиррикай чавай Миграгъ Къемер, Кьурагь Гьафизат, КьепIир Айисат, СтIал Саяд, Ахцегь ФатIимат ва масабур къалуриз жеда.
Лезги литературадиз ХХ асирдин кьвед лагьай паюна атай СтIал Мислиматни чи шииратда дерин гел тур шаир дишегьлийрикай сад я. Адан яратмишунрин кьилин темаяр инсандин кьадар-кьисмет, жемиятдин гьалар, ватанпересвал, михьи муьгьуьббат, хайи чилел кьарувал ва масабур я. Шаирдин эсерриз чIалан девлетлувал, фикиррин хцивал ва веревирдерин деринвал хас я.
И мукьвара филологиядин илимрин доктор, машгьур гьикаятчи Гьаким Къурбана СтIал Сулейманан районда са куьче (СтIал Мислимат яшамиш хьайи куьче) шаир дишегьлидин тIварцIихъ ягъунин месэла къарагъарна. Заз чиз, хъсан фикир я. СтIал Мислимат мадни чIехи дережайриз лайихлу шаиррикай сад я. Гьавиляй зани и фикирдин тереф хуьзва ва ам кьилиз акъудуниз эвер гузва.
Азиз Мирзебегов,
филологиядин илимрин кандидат
