Алатай кишдиз СтIал Сулейманан райондин КIварчагърин хуьре бокс вилик тухунай Гь.Аллагьвердиеван тIварунихъ галай центрада 2007-2009-йисара дидедиз хьанвай жаванрин арада спортдин и жуьредай Кьиблепатан Дагъустандин кIвенкIвечивал патал акъажунрин финал кьиле фена. Райондин спортдин, туризмдин ва жегьилрин крарин рекьяй комитетдин куьмекни галаз и акъажунар тешкилнавайди Кьиблепатан Дагъустанда боксдай старший тренер, Дагъустан Республикадин физический культурадин лайихлу работник Альберт Межидов тир.
Акъажунриз килигиз, и юкъуз КIварчагъ дередиз республикадин меркездай багьа мугьманрин еке делегацияни атанвай. Адан кьиле РД-дин спортдин ва физический культурадин рекьяй министр Сажид Сажидов авай. Багьа мугьманрин арадай машгьур боксер, спортдин международный классдин мастер Гьабиб Аллагьвердиеван, райондин кьил Саид Темирханован тIварарни кьаз кIанзава.
Къизгъиндаказ кьиле фейи акъажунрин нетижада СтIал Сулейманан райондин боксерар 1-чкадиз лайихлу хьана. 2 ва 3-чкаяр Къайтагъ ва Мегьарамдхуьруьн районрин жаванри кьуна. Абуруз кубокар, медалар ва грамотаяр гана. Акъажунра тафаватлу хьайи 10 боксёрни пишкешриз лайихлу хьана. Кьилди къачуртIа, абурун арада КIварчагъай тир Ильхан Эзбербегов, Маджалисдай — Ислам Мегьамедов, Самурдай Заур Османов авай. Республикадин спортдин министрди ва райондин кьили жаванрин алакьунриз виниз тир къимет гана.
— Чи республикадихъ спортдин рекьяй гьамиша хъсан адетар хьайиди я. Абур чи жегьилри давамарзава. Чи спортсменри хъсан нетижаяр къазанмишзава, Дагъларин уьлкведин тIвар вири дуьньяда машгьурзава. Спорт ва физический культура вилик тухуниз республикадин кьиле авай ксарини артух фикир гузва. Спортдин хилен къурулушар арадал гъун ва вилик тухун патал алакьдай вири крар кьилиз акъудзава. Бажарагълу спортсменриз ва абурун тренерриз еке куьмекар гузва. КIварчагърин хуьре боксдин центр са шумуд йис идалай вилик меценатди кардик кутуна. Къенин юкъуз ина спортдин и жуьредай хъсан школа арадал гъиз алакьнава. Иниз боксерар гьазурдай чад лугьузва. Республикадин кьиле авай ксарин ва меценатрин куьмекни галаз чна районда инлай кьулухъни спортдиз артух фикир гуда. Чна и акъажунра кIвенкIвечивал ва приздин чкаяр къазанмишай вирибур тебрикзава. Спортдин мярекатдин вири иштиракчийрихъ еке агалкьунар, спортдин кесерлу майданра чпин устадвал къалурдай къуватар хьурай! — алхишна Саид Темирханова.
Дагъустандин Кьил Сергей Меликован тIалабуналди Сажид Сажидова боксдин центрадиз пишкешар (спортдин тадаракар ва маса шейэр) гана.
С.Темирханова спортдин министрдиз, республикадин кьиле авай ксариз ва кьилди Сергей Алимовичаз райондиз вири жуьредин куьмекар ва спорт вилик тухунин месэлайриз артух фикир гунай сагърай лагьана.
Рагнеда Рамалданова
