5-7-июлдин йикъара Махачкъаладин Октябрдин революциядин 50 йис тамам хьунин паркуна республикада сад лагьай сеферда  яз Хизандин фестиваль кьиле фида. Мярекат 8-июлдиз къейдзавай Хизандин, муь­гьуьб­батдин ва вафалувилин йикъахъ галаз алакъалу яз тешкилнава, хабар гузва Да­гъус­­тан Республикадин карчийрин ихтиярар хуьнин рекьяй Тамам векилвилер ганвайдан аппаратдин пресс-къуллугъди. Къейдзавайвал, РД-дин карчийрин  ихти­ярар хуьнин рекьяй Тамам  векилвилер ганвайдан куьмекдалди фестиваль теш­килнавайди “Бизнес Клуб Дагестан” АНО  я.

“Хизандин фестиваль кьиле тухунин макьсад хизандин ивирриз, сагълам яша­йишдиз гузвай фикир артухарун, Да­гъустан­дин хизандин дережа виниз хкажун ва ада кьунвай чка мягькемарун, властдин, бизнесдин ва жемиятдин арада алакъаяр тайинарун, регионда яшайишдин месэлайрихъ элкъуьрнавай  карчивилиз рехъ гун я лагьайтIа жеда”, — баянар гузва пресс-къуллугъдин ма­луматда.

Фестивалдин программадик Да­гъустан Республикадин артистрин ва яратмишунрин кIватIалрин иштираквал авай концерт тешкилун, ярмарка-выставка, гатун кинотеатр, ая­лар ва чIе­хи­бур патал мастер-классар, хизанрин акъажунар, конкурсар кьиле тухун ква.

Мярекат акьалтIарзавай виридалайни итижлу вакъиа яз, арадал атанвай цIийи хизан регистрация ийида.

Чи мухбир