29-августдиз Табасаран райондин Хучнида авай «Ирид стхадинни са вахан» къеледа хизандин йисаз талукьарнавай мярекат шад гьалара кьиле фена. Аниз Дагъустан Республикадин Гьукуматдин Председатель, Дагъустандин Кьилин везифаяр вахтуналди тамамарзавай Абдулмуслим Абдулмуслимов атанвай.
Багьа мугьман Халкьдин собранида РД-дин Кьилин патай векил Нуьсрет Омарова, Табасаран райондин кьил Мегьамед Къурбанова, СтIал Сулейманан райондин кьил Саид Темирханова, къунши районрин кьиле авай ксари, РД-дин Халкьдин Собранидин депутатри, жемиятдин тешкилатрин векилри, фуни кьел гваз, хушдиз къаршиламишна.
А. Абдулмуслимова, Н. Омарова ва атанвай мугьманри райондин рикIел хуьнин багъда дяведин махсус серенжемда телеф хьайи аскерриз эцигнавай тимталдал цуьквер эцигна. РД-дин Гьукуматдин Председателди районда кьиле физвай мярекатда иштиракзавай уьлкведин хатасузвал хуьз махсус серенжемда телеф хьайи аскеррин багърияр, «Дидейрин къуват» кIватIалдин векилар хушдиз кьабулна, ватанпересар тербияламишунай виридаз сагърай лагьана
Ада къейд авурвал, Табасаран райондай тир Ватандин ЧIехи дяведин игитрин несилри чпин ватанпересвилин буржи къе кьегьалвилелди СВО-да тамамарзава. Абурун арада Россиядин Игитар — Руслан Къурбанов, Исрафил Мамедов, Рустам Мурадов ва хейлин маса кьегьал рухваяр ава. Инлай вири Хизандин йисан кьилин мярекатар кьиле физвай 12 райондинни кьве шегьердин майданрал хкаж хьана.
Сифте мугьманар аялрин арт-майдандиз килигна. Абуруз гъвечIи художникар тир Мугьамадани Аманата чIугунвай пейзажар хуш хьана. РД-дин жегьилрин крарин рекьяй министерстводин майдандал мугьманриз БПЛА-дин (пилот галачиз лув гудай аппарат) операторар гьазурзавай «Дронрин школа» проект къалурна. Проект гъиле кьуна, кьилиз акъудзавай Милли инновациядин колледждин кьиле авайбуруз Председателди еке къимет гана.
Табасаран райондин майдандал алай гамарин нехишрин гъвечIи кIалубриз килигдайла, М. Къурбанова А. Абдулмуслимоваз районда халичайрин музей кардик кухтаз кIанзавайдакай лагьана. Ахпа мугьманри, вири районрин ва шегьеррин гьаятра авай этнокультурадин, гъилин сеняткарвилин шейэриз килигна, милли хуьрекрин дад акуна.
СтIал Сулейманан райондин майдандал агакьайла, чIехи мугьмандин вил анал алай хъенчIин къапара акьуна. С. Темирханова, са гичин къачуна, районда хъенчин къапар ахкъуд хъувуник кьил кутунвайдакай суьгьбетна. А. Абдулмуслимов гьаятдай пара рази яз экъечIна.
Мегьарамдхуьруьн райондин (яр-емишдикай ва маса тIямлу шейэрикай рахазвач) майдандал лезги хьар гъана, фуни хъчадин афарар чраз, мугьманриз пайзавай… Айдун Мегьамедов кьиле авай ашукьрин дестеди манийрик ван кутунвай. Райондин культурадин отделдин регьбер Эседуллагь Селимован гафарай малум хьайивал, райондай мярекатда 100 касди кьван, гьа гьисабдай яз 4-7 аял авай кIуьд хизандини иштиракзавай. 49 йисуз Советский хуьре санал яшамиш хьанвай Гьабибов Мегьамеданни Магьижатан, Билбилхуьряй Саидов Тимуранни Фаридадин хизанарни гъанвай. Мегьамедан — кьуд, Тимуран кьве гадади махсус серенжемда иштиракзва.
Кьурагь райондай мярекатдиз, кьиле райондин культурадинни туризмдин центрадин регьбер Абдулкъадир Будаев аваз, еке делегация атанвай. Абурун милли хуьрекар дадмишиз, куьгьне девирдин къаб-къажахдиз килигиз, культурадин отделдин хорди лугьузвай манийриз яб гуз, туристарни кIватI хьанвай. Мярекатда Кьурагь райондин гзаф аялар авай пуд хизандини иштиракна.
Адет тирвал, хъсандиз гьазур хьана, Ахцегь ва Докъузпара районрин делегацияр, гзаф аялар авай хизанарни атанвай.
Хизандин йисан кьилин мярекат къеледин къвалав гвай, махсусдаказ туькIуьрнавай майдандал кьиле фена. «Дагъустандин хизан» сувар тухудай чка дуьшуьшдай хкянавайди туш.
Табасаран райондин гьаятдиз килигай А. Абдулмуслимова Кьиблепатан Дагъустандин халичаяр хразвай устадриз адетдин гъилин сеняткарвилер хуьнай сагърай лагьана.
Ахпа ада Дагъустандин гзаф аялар авай 13 хизандив гьукуматдин шабагьар вахкана. Абурун арада Кьурагь райондай — Исаеврин, Мегьарамдхуьруьн райондай — Мегьамеданни Магьижат Гьабибоврин, СтIал Сулейманан райондай — Саидагьмедоврин, Ахцегь райондай Нажмудинанни Ольга Гудаеврин ва масабур авай.
Вини дережада аваз тешкилнавай суварин мярекат табасаранрин драмтеатрдин, СтIал Сулейманан тIварцIихъ галай лезгийрин муздрамтеатрдин, районрай атанвай художественный самодеятельностдин артистри лагьай манийри, «Каспий» ансамблди авур кьуьлери мадни фикир желбдайди авуна.
Къагьриман Ибрагьимов
