Чи ватанэгьлияр — гьар сана

Франциядин писатель Анатоль Франсахъ ихьтин са келима ава: “Художникдиз уьмуьр гзаф кIан хьунилай гъейри, ада ам гуьрчег тирди чазни субут авун лазим я”.

И сеферда заз хиялрихъ, фикиррихъ часпарар авачир, ажайиб картинкаяр арадал гъизвай бажарагълу художникдикай ихтилатиз кIанзава. Ам  Сияра  Къиясовна  Аккизова  я, Кабардино-Балкариядин халкьдин художник, Россиядин художникрин Союздин, яратмишунрин международный академиядин член. Адан яратмишунар Россиядин, къецепатан уьлквейрин музейрани кьилдин ксарин хсуси коллекцийра ава.

Ам 1943-йисан 16-январдиз Ах­цегьа Дагъустандин халкьдин писатель Къияс Межидован хизанда дидедиз хьана. 1965-йисуз М.А. Джемалан тIварунихъ галай Да­гъус­тандин художественный училище куьтягьна. 1965-1976-йисара Кабардино-Балкариядин художественный фондуна художниквиле кIвалахна. Сияра Аккизова художникрин хизандай я. Адан уьмуьрдин юлдаш Якьубни художник тир, руш Имарадизни и рекьяй еке алакьунар ава. Сиярадинни Якьубан гзаф яратмишунар Юкьван Азиядин, Польшадин, Германиядин, Вен­гриядин, Америкадин, Украинадин, Белоруссиядин, Литвадин, Гуржистандин, Дагъустандин изобразительный искусстводин милли музейра ава.

Кабардино-Балкарияда яшамиш жезватIани, Сияра Къиясовнади ватандихъ галаз алакъаяр атIан­вач. Милли дувулрихъ галаз алакъалу нехишрин алем, гъвечIи суьретра куьрелди къалурзавай чIехи метлеб — ибур С.Аккизовадин та­фаватлу хатI къалурзавай кье­тIен­вилер я. Бажарагълу устаддин картинкаяр шадвилив, кIанивилив, экуьвилив ацIанва, абур адет­динбур тушир фикирралди, кIа­луб­рал­ди ва рангаралди тафаватлу жезва­.

Ам аялар патал акъудзавай ктабар иер шикилралди чIагурзавай устад хьизни машгьур я. Ада къалпвал квачир, аялри хушвилелди кьабулдай суьретар арадал гъизва. Республикайрин, уьлкведин ва вири халкьарин дережайра кьиле физвай выставкайра иштиракзава. 2000-йисуз ам вири халкьарин “Золотая па­литра” выставкадин “Эксперимент в живописи” номинацияда сад лагьай премиядиз лайихлу хьана.

Яратмишунрин рекье адахъ мадни хейлин агалкьунар хьанва. 2000-йисуз изобразительный искусстводин “Нартский эпос-2000” конкурсда ада пуд лагьай чка кьуна. Яратмишунра къазанмишнавай агалкьунрай, изобразительный искусстводик чIехи пай кутунай ам са шумуд сеферда Кабардино-Балкария республикадин медениятдин министерстводи гьуьрметдин грамотайралди къейда.

Къанни цIуд йисалайни гзаф вахтунда Россиядин ва международный дережадин машгьур выставкайра Якьуб ва Сияра Аккизоври санал иштиракна. 1994-йисуз Сиярадин уьмуьрдин юлдаш Якьуб­ рагьметдиз фена. Саналди яратмишай адетар давамаруналди, руьгьдай ават тавуна, Сияра Къиясовнади кьилди кIвалахна, яратмишунар мадни вилик тухвана ва ге­гьеншарна.

“Анжах халкьдин руьгьдин медениятдин бинеяр мукьуфдивди гьиссзавай художникдиз хас тирвал, ада инсанар патал кьетIен нур чукIурзава. Сияради Якьубахъ галаз санал ва гуьгъуьнлай арадал гъайи суьретри изобразительный искусстводин медениятдик еке пай кутунва”, — лугьузва искусствовед Н.Сундуковади.

Адан хсуси выставкаяр Наль­чикда, Пятигорскда, Киевда, Грозныйда, Тбилисида, Махачкъалада, Майкопда, кьве сеферда Москвада кьиле фена.

Пятигорскда авай М.Лермонтован гьукуматдин музейдин экспозицийрин отделдин заведующий Ольга Алексенкоди чи ватанэгьлидин ба­жарагъдиз вижевай къимет ганва: “Художникдал ихтибарна, са кIус­ни­ тади квачиз, итижлувилелди­ адан къаматрин-шикилрин алемдиз гьахьиз ва адан гъавурда акьаз­ ала­хъуналди, тамашачиди выставкайрин залдай хъфиниз тади ийизвач. Сияра Аккизова — машгьур­ ва масадаз ухшар тушир, кьетIен устад я”.

Сияра Къиясовнадихъ чандин сагъвал ва гуьрчег затIар яратмишунин карда мадни еке агалкьунар хьурай!

К. Ферзалиев