МВД-дин хроникадай
Ногъай райондин агьалидал 38 хеб чуьнуьхунай шак фенва. Идакай РД-дин МВД-дин пресс-къуллугъди хабар гузва. 14-ноябрдиз Ногъай райондин полициядин дежурный частуниз 49 йисан яшда авай чкадин агьали арза ийиз атана. Ада малум тушир касди чуьлда авай вичин 38 лапаг (абурун умуми къимет – 456 агъзур манат) чуьнуьхнавайдакай хабар гана.
Полициядин къуллугъчийри угъривал авунай шак фенвай кас тайинарна. Червленные Буруны хуьруьн 45 йисан яшда авай агьалидин хсуси фермада полицейскийриз тIамгъаяр алай лапагрин хамар жагъана.
Угъривал авунай шак фенвай агьали РФ-дин УПК-дин 91-статьядин бинедаллаз кьуна. Тахсиркарвилерин лишанриз килигна, РФ-дин УК-дин 158-статьядин 2-паюнин «а, в» пунктарай (угъривал) уголовный дело къарагъарнава. Силисдин кIвалах давам жезва.
«Лезги газет»
