И къейд кхьиниз зун “Фейсбук” сетда и йикъара сад-кьве ватанэгьлиди “Лезги газетдин” тIварцIикай, гьакIни газетдин чинрилай гузвай хабаррикай авур веревирдери мажбурна.
АкьалтIай кагьулбегар, темпелар квачиз, амай саки вирибур интернетдин соцсетра хайи чIалакай, газетрикай рахазва, веревирдерзава, гьатта “акI туш, икI я”, “акI кхьимир, икI кхьихь…” лугьудайбур, тапшуругъарни буйругъар гудайбурни кими туш. Гьахълу ва хъсан теклифар гьамиша тебрикун лазим я. И месэла чна рикIелайни ракъурзавач. Муькуь патахъай фикир гайитIа, аквазвайвал, чIалан “пешекаррин”, “гьурра ватанпересрин” кьадар югъ-къандавай артух жезва.
Сада газетдин тIвар “Лезгийрин газет” хьун дуьз яз гьисабзава, амма алай тIвар вучиз дуьз къвезвачтIа, гьа фикир адалай делилламишиз алакьнач. “Лезги” гафунин лишанриз морфологиядин жигьетдай фикир це лагьайла, ватанэгьлиди заз «падежар рикIел хкун» теклифна. Къариба веревирдерзавайбур жегьил-жаван инсанар тиртIа, абуруз суалар гудайбурни, абурун фикирдилай наразивалдайбурни бажагьат жедай. Абурун фикирар ягъалмишбур тирди хейлинбуру кхьей жавабри мад сеферда тестикьарна. Кьве кIвач са чапатIда туна акъвазнавайбуруз са вуч ятIани субутун кьиле тефидай кар я.
Кьвед лагьай “фейсбуквиди” миллетдин тIвар алай газет мад нихъ ава лугьуз, им виже текъведай, кутуг тавур кар яз гьисабна. Шад жедай кар ам я хьи, ихьтин “ажайиб” фикирар малумарзавайбурун кьадар тупIаралди гьисабиз жедай кьван тIимил я.
Са масада газетди уьлкведин, дуьньядин хабарар раижун лазим жезвач лугьузва. Гьа инал къейд ийин, газетдин чинрилай гузвай жуьреба-жуьре хабарар, гьа жергедай яз “Дуьньяда” рубрикадик кваз акъатзавайбурни кIелзавай лезгийрин кьадар гзаф я. (Газетдайни, сайтдайни, соцсетрайни). Са шумуд йис идалай вилик са гъвечIи муддатда дуьньядин хабарар, агьвалатар газетдай раиж хъувуначир, гуьгъуьнлай кIелчийрин патай наразивилер арадал атуникди тадиз а рубрика чкадал хкана.
Ихьтин макъамра вуч лугьуз жеда кьван? Газетдин гьар са нумрада жуьреба-жуьре месэлайриз, хилериз талукь макъалаяр, хабарар гьатзава. Абур кIелчийрин вири къатариз хуш тахьун тIебии кар я.
Гьардахъ вичин тIям, вичиз хуш ва майилвалдай крар жеда. Им гьуьжет алачир месэла я. Вирибуруз хешил бегенмиш жедач эхир. Садан рикI хинкIалдал жеда, муькуьдан — шурвадал, са масадан — ашдал… ГьикI кIандатIани хьуй, хуькуьрун хьуй лагьана эгечIна виже къведач. Камаллу, дуьзгуьн теклифриз чун акси туш.
К. Ферзалиев
