Алатай хъуьтIуьз аранда ерли жив къванач. ТIебиатдин къулай шартIарикай векьер-кьалари, тарари,инсанри, гьавадилай гзаф аслу тир гьайванри менфят къачуна.
КIвалин къуьрери шапIаяр фад хана. Чазни кьве кьефесда кьве бугъаз къуьр авай. Са къуьре февралдин юкьвара вад шараг хана. Сифтедай абур дуьньядал вилерал перде алаз акъатзава. ЯтIани диде къуьре абуруз нек гузва, йифиз къаюкай хуьн патал векьералди ва вичин бедендалди кIевзава, мука къулай шартIар твазва. ЦIуд йикъалай шапIайрин вилер ахъа жезва, дидедихъ галтугна нек хъвада. Хъуьтуьл памбаг хьтин кIватIи-кIватIашриз килигайла, галатун рикIелай алатда, гуьгьуьл ачух жеда.
Зи кайваниди, диде къуьрек нек гзаф хьурай лугьуз, саларай дувуларни галамаз адаз къацу векьер гъиз вегьена. Сифтедай гьайвандин кефи къумбар тир. Кьве йикъалай диде къуьр начагъ хьана. Чак къалабулух акатна. Шарагрин са варз кьванни жедалди амукьнайтIа лугьуз, гьайифар чIугвазвай. ТукIваз гъил атанач.
Пакадин юкъуз зун кIвалахдилай хтайла, къуьрен гьалдиз килигиз фена. Кьефесдин юкьвал къуьр гиликьнавай. ШапIаяр, дидедихъ чин элкъуьрна, юзан тийиз, чеб-чпив агатна, дидедин мейитдиз килигзавай. И шикил акур заз шел атана. Зи рикIел жегьил чIавуз гъурбатда (ЦIийи Узень) юлдаш, кьуд аялдин диде, кIвале рагьметдиз фейила, аяларни зун шехьзавайвал хтанвай. Зи шел кьагьурдиз элкъвенатIани, жуваз сабур гана, къуьр кьефесдай акъудна, салан пипIе кучукна.
Лугьудайвал, хер акурди хирен устIар жеда. ШапIайриз килигун жуван хивез къачуна. Шприцдалди нек гузва. Гатфарин рагъ авай йикъара абур кьефесда чеб-чпихъ галаз къугъвазва. Умуд кутаз жеда хьи, зи аялриз хьиз, шапIайризни чпин, “хизанар”, кьефесар жеда.
Гьуьрметлу кIелзавайбур, садазни рикIел хер жедай крар тахьурай! КIеве гьатнавай гьайванриз куьмек це! Эвездай куь рикIериз регьим яда. Диде-бубайрин, веледрин арада гьуьрметлувал артух жеда.
Гьасан Гьуьсейнов
