И йикъара за “Лезги газетдин” чинилай журналист, литературовед, бажарагълу шаир, критик, газетдин литературадин отделдин редактор Мердали Жалилован “Милли журналистика: Социализмдин пайдах” тIвар ганвай гегьенш макъала кIелна.
Ам кIелайла зи гьевес акваз-акваз хкаж хьана. Автордиз баркалла ва рикIин сидкьидай чухсагъул! Заз жуваз са тамарзу, багьа ва ядигар шей жагъай кьван шад хьана. Макъала кIелдай гьар садавай ам кхьенвайди гьакъикъатдин гъавурдик квай кас тирди гьасятда кьатIуз жеда. Вичин макъалада авторди зеррени фашалвал, таб квачиз, серфзавай гафарин таъсирлувал хвена, лезги чIаланни литературадин муаллимрин рикIе фадлай эрзиман яз акъвазнавай макьсад, яни шаиррикай дуьз ва тамам делилар гун кьилиз акъуднава. Нетижада, гьелбетда, мектебра кIелзавайбурун кIелунин ва чирвилерин дережа хкажуниз таъсирдай рекьер гегьеншарнава.
Лезги поэзияда А.Фатахов классик Етим Эминан ирссагьиб тирдал шак гъиз жедач. Муькуь патахъай, А.Фатахов урус халкьдин чIехи шаир В.Маяковскийдин ученик ва ирссагьиб хьизни гьисабиз жеда. Алибег Фатаховани, В.Маяковскийди хьиз, шииррин цIарар гурарин кIарар хьиз тартибда тунва, чебни манадин жигьетдай хкянавай формадихъ галаз бегьем кьазва.
А.Фатахова вичин эсерар еке ашкъидивди, яб гузвайдан бейнидиз таъсирдайвал кIелдай. И жигьетдай В.Маяковскийдин ва А.Фатахован эсерар кIелунин методикадин сирер сад хьтинбур тир. Алибега лезги шииратда тур цIийи къайдадикай Дагъустандин халкьарин шаиррини гележегда чпин яратмишунра менфят хкудиз хьана. Гила кар алай месэла гележегда лезги хрестоматиядин ктаб чапдай акъуддайла, авторри шаиррикай кхьенвай малуматра ахъайнавай гъалатIар туькIуьр хъувун я. ТахьайтIа вуч жезва? Ктабда ганвай материал кIелайла, я муаллимдиз темадай бегьем чирвал жезвачир, я кIелзавайбуру вугузвай суалризни тайин жавабар жагъизвачир.
Алибег Фатахов лап жегьилзамаз, 25-йисан яшда аваз, 1935-йисуз рагьметдиз фена. Яратмишдай рекье еке бажарагъ авай шаир кечмиш хьайила, Дагъустандин гьукуматдин “Дагъустандин правда” газетда некролог чапна. Ана А.Фатаховаз талукьарна “талантище” гаф ишлемишнавай. И гафуни вуч тестикьарзава? Им Алибег Фатахов Дагъустандин лап бажарагълу шаиррин жергеда лап бажарагълу шаир тир лагьай чIал я.
Ишреф Жаватов,
пенсияда авай муаллим
