20-июндиз саналди тир пландихъ ва серенжемрихъ галаз рейсад яз, чкадин агьалийрин уьмуьрдин гьерекат хатасузвилелди таъминарунин рекьяй Мискискарин «Солнышко» тIвар алай аялрин бахчада террориствилин чуьруьк ва  цIай кьунин нетижа арадал атай дуьшуьшра, аялар къутармиш авунин рекьяй тежрибада виже къведай гьерекатрин ва кьабулна кIани эвелимжи серенжемрин рекьяй вердишвилер кьиле фена.

Ам антитеррордин комиссиядин, дежурный-диспетчеррин къулугъдин, агьалияр лап кьетIи гьалара къутармиш авунин рекьяй кардик квай отделдин ва сад тир гьамиша къуллугъдик квай 37-нумрадин пожарный частунин пешекаррин, Россиядин МО МВД-дин «Ахтынский» тIвар алай полициядин работникрин ва райондин азарханадин духтуррин иштираквал аваз кьиле фена.

Виликамаз тестикьарнавай пландин бинедаллаз и мярекатда аялрин бахчадай 20 касди, пожарный частунай 16 касди, 4 полициядин пешекарди ва тади куьмекдин 3 духтурди иштиракнай.

Ам тухунин макьсад, террористри къурху гана, са кар арадал атайла ва я аялрин бахчадин дараматди  цIай кьуртlа, инсанрин хатасузвал хуьнин тегьерар чирун тир.

Атанвайбуру аялриз, тербиячийриз цIай кьурла ва я тахьайтIа шак фидай шейэр акурла, бахчадин къене аваз са тахсиркарвал хьайи вахтунда, террористри къурху гана са кар арадал атайла,  бахчадин къене есирвилиз кьурла ва мадни душмандин гьужумдикай, цIаярикай хуьн патахъай кьабулна кIанзавай серенжемрикай суалар вугана, чирвилер ахтармишна.

Хатадикай хуьн патал, са чкадай маса чкадиз акъуддай вахтунда аста, дикъетлу гьерекат авун герек тирди лагьана.

Мярекатдин вилик эцигнавай месэлаяр иштиракчийри  агалкьунралди кьилиз акъудна.

В.Агъамурадов